aniztasunean

ETAren JAKINARAZPENA

2011-01-20T03:45:00.000-08:00

Kaixo lagunak:

Hamaika buelta eman zaizkio komunikatuari; hamaika tertulia eta iritzi artikulu. Beraz ez naiz ni hasiko horrekin bueltaka, zuzen-zuzenean ondorioei helduko diet, beti ere ikusmolde partikularrean oinarriturik, noski.

Gaudenean gaudela nik ondorioztatzen dudana honakoa da:
1.ETA-k utzi du borroka armatua. Betirako delakoan nago ni.
2.ETA-k ez du bere burua disolbatu. Disolbatzea bidearen bukaeran dogoena da, baina asko dago ibiltzeko (kartzela politika, ezker abertzalearen legalizazioa,...).
3.Betirako desagerpena negoziazio prozesu luze baten ondorioa izanen da.
4.Bien bitartean armak uzte-prozesua itzuli ezina egiaztatu egingo da.

Bestelako ondorioak antzematen ari gara. Alderdiak hasi dira kokatzen ETAren ondorengo garaian eta hasi dira jada posizioak markatzen. Noski, zurrunbiloaren gune gogorrena ezker abertzalearen esparruan kokatzen da. Orain arte Ezker Abertzale ilegalizatua izan da indar nagusia esparru honetan. Hala ere ETAren izate hutsak aurre-bidea eman die beste indarrei (EA-ko ezker sektorea, Aralar, eta beste talde txikiak). Egun, ilegalizazioaren ondorioz, ez dakigu zein den bakoitzaren gizarte zola. Bestalde urteetan zehar batzuek eta besteek zaindu eta heldu dituzten kultur politikoak oso desberdinak dira. Beraz, gaur egun ikusten ara gara benetako borroka politikoa irekita dagoen EZKER ABERTZALEko mugimendua lideratzeko. Aralar, Ezker Abertzale ilegalizatua, EA, Alternatiba, Batzarre,… denok nahi dugu lidergoa berregituraketa prozesuan. Politikariok gurekoiak “ego”koiak gara; denok aitortzen diogu gure buruari zilegitasun eta gaitasun gehiago hurkoari baino. Zenbat bilera, zenbat hitz jario, zenbat ego,… Eta zenbat politika? Aukeran, gutxizko.

EAJk distantziak markatu ditu Ezker Abertzaleko esparruarekin eta PSOErekin paktatu du ETAren amaierari laguntzeko prozesua. Nonbait guzti honen etekin politikoaren banaketa bion artean egingo da, prozesu bera hondora ez dadin.

PSOE Ezker Abertzale ilegalizatua ahultzen ari da, lider potentzial indartsuak izan daitezkeenak gartzeleratuz. Dena ETA dela hastapenaren aplikazioa baliatzen du horretarako; Miren Zabaleta, Arnaldo Otegi, Iker Moreno, eta abar luze bat Espainaian barreneko kartzeletan isolatuta daude. Zenbat gartzeleratu dute azken hilabeteetan, politika besterik egin ez dutenak? Espainiako preso politikoen zerrenda eten gabe hazten ari da. Nire iritziz PSOEk ez du nahi ETAren ondorenean Ezker Abertzaleak lider karismatikorik izan dezan. Nola lortu? Gartzelak betez.

PP-UPN eroso daude kinka honetan. Ez dute ardura zuzenik eta batera eta bestera jotzeko aukera baliatzen dute. Galtzekorik, ezer ere ez; irabaztekorik, askotxo. Pakerako bidea leuntzen ez dute lagunduko, begi bistan behintzat. Atearen atzekaldetik, ikusten ez den horretatik, lagunduko dutelakoan nago. Izan ere pakea guztion gogoa eta lana da.

Hauek horrela nire ustez Ezker Abertzalearen gizarte-esparru zabalean dauden indar guztiek hizketa prozesu geldia hasi behar dute, berregituraketa berria bultzatzeko. Balizko lidergoak bazterrean utzi, hauteskundekeria ere bai bazterrean utzi, eta elkarrekin hasi beharko da lehenbailehen ontzi berria eraikitzen, denok kabitzeko modukoa. Aralarrek eta Ezker Abertzale ilegalizatuak ezin dute jardun elkarri bizkar emanda. Banaketa hau aurkari politikoaren mesede besterik ez da.

Izan ongi eta hurrengora arte

PORROTAREN EZKORTASUNAZ

2010-12-14T05:42:00.000-08:00

Bai, sozialismo errealaren porrotak erreferentziarik gabe utzi gintuen. Komunismoaren mozorroa hartu duten diktadore gupidagabeek auzo-lotsak eta amorruak jota utzi gintuzten. Fidelen kontraesan gaindiezinek ilundu digute haren proposamena.

Sobietarren errepublikaren atzetik sasi esperimentu sozial guztiak erori ziren, bata bestearen atzetik,oinarririk gabe eraikitako errealitate faltsuak zirela erakutsiz. EEBBen eta Sobietarren arteko gerra hotzak nerabezaroan zeudela txikitu zituzten esperientzia gazteak: Txekia, Txile, Suedia (nork hil zuen Olof Palme?). Kapitalismoaren baitan molestagarriak ez diren erdi bideko esperientzia batzuk loratu dira: kooperatibak, komuna txikiak (Lakabe, Arginaritz,…); ezer ez kapitalaren unibertso zabalean. Bien bitartean aberatsak, gero eta aberatsago, pobreak, gero eta pobreago, eta ase ezinezko kontsumoaren barne grinak martirizatuak. Aberastasuna gero eta esku gutxiagotan biltzen da. Lurra, gero eta eskasagoa kontsumo gosea asetzeko.

Kontraesanek ez digute loa galarazten. Jakin badakigu tanke edo gerra hegazkin baten prezioan Madrileko kale aberatsetan hotzak hilko dituen baztertuko guztiei bizibide duina eman ahal geniekeela. Hain da agerikoa, eta hainbestekoa da ezina. Horrekin bizi gara

Eskuin kapitalistak indartu du bere errelatoa. Ezkerrak ez du errelatorik. PSOEk amore emanda dago, eskuinaren aginduak betearazten. Egun hauetan gertatzen ari dena beldurgarria da. Espainiatik paseatzen ari dira kapitalismo gordinaren goi ordezkari guztiak (aurpegia jartzen dutenak, alegia. Trichet –Europako Banku zentraleko burua-esate baterako). Denak esaten diote gobernuari zer egin behar duen, ozen eta argi, beti ikuspegi bakar batetik abiaturik noski. Gobernua, isilik; irenstekoak erabat zabalduak. Bankuetako goi ordezkariak, garaiak aupaturik, ez dira atzean geratzen agintzeko orduan. Gobernua, segi irensten.

Baina ezkortasunaren ezkortasunaz egoteko zio nagusia wikileaksek eman dit: Jaungoikoaren ordezkari lurtarra Madriden dago, Estatu Batuetako enbaxadan. Haren bulegotik pasatzen da den-dena. Ez da ezer garrantzizkorik egiten haren baimenik gabe. Hari aitortu behar zaio, hari baimena eskatu eta hari barkamena erregutu. EEBBekiko morrontza hainbestekoa dela baieztatzeak, are eta gehiago areagotu du nire ezkortasuna

---------- : ----------

Aurrekontuak tarteko, lasai samar antzematen dut ingurugiro politikoa. EAJ aurre-aurreko borrokari uko eginda, PSOE eroso, PP-UPN lasai. Gainerakoak, ahal dena.

Hurrengora arte lagunak

NON DAGO EZKERRA?

2010-11-29T10:54:00.000-08:00

A. Zapatero Espainiako ultraeskuindarren itzalpera joan da lasterka, beldurraren beldur. Pertsonaia honen gira-bira ulertezina egiten zait. Ezkertiar aurrera-zalea eta ausartatzat aurkeztu zuen bere burua; nik neronek halakotzat nuen, baina ekonomiak zigortu gaituenenan, a zer aldaketa! Ez du lotsarik izan 39 enpresari diztiratsuenen esanetara makurtzeko. Haiengan bilatu ditu aholkuak, horiengandik lortu du etorriko zaizkigun neurrien justifikazioa. Ez dakigu zer eskatu dioten; ez dakigu zer ordainduko dien. Badakigu guzti hau ez zaigula dohainik aterako. A zer poza guzti hauena, eskuinaren ordezkari argiak batzuk, muturreko eskuineko ordezkari ilunak haietariko beste asko. Bien bitartean ezkerra isilik, zapuztuta, kuzkurtua bere baitan, beldurti. Ez al dugu aukerarik? Ez al dugu proposamenik? Ez al dugu pentsamendurik?

B. Katalunian CiUk irabazi du, argi eta garbi. Oro har zentroaldeko eskuinak bildu du hautesleen bozka gehienak. Ezkerraren ahotsa isilduta geratu da. Iniziatibak eta Ezker Errepublikarrak, PSCrekiko zuten hartzaren besarkada hartatik askaturik, ahotsa goratuko dute. Denboraz kanpo, zereginik ez dutelarik. PSCk barne hausnarketa sakona egin beharko du eta ideia eta lidergoak berritu.

C. Euskadin, PSEk ez du ekimen ezkertiar bakar bat ere aurkeztu, daramagun legealdi honetan. Eskuinaren ideologiaz babestuta dago, eta PPrekin duen hitzarmenak aitzakitzat baliatzen du, ezker politikarik ez egiteko. Aitortu behar dut sentiberatasun ezkertiarra sumatzen dudala Hezkuntza esparru zabalean. Saiatzen ari dira eusten Hezkuntza Publikoari; publikotasunaren zutabe hau, behinik-behin, ez dadila eror. Seguruenik Isabel Celáa izanen da Gobernu honetan zeresan handienetakoa.

D. Nafarroan UPN indartsu antzematen dut. Ahulezirik antzematen bada, berehala agertzen zaio PSN bidelagun. Nire ustez biak ala biak hauteskunde ondorengo koalizioa gozotasunez heltzen ari dira. Elkarretaz gustatzen diren maitale hasi berrien moduan jokatzen ari dira. Eztabaida txikiak antzesten dituzte, gainerako lagunen atentzioa eurenganatzeko, baina gero eta kateatuagoak dira. PSN ez da gai UPNren politika eskuindarra eztabaidatzeko; bere aurkakotasunak bigarren mailako aferetan edo zama ekonomikorik ez duten horietan daude. Eredua ez dute inolaz ere zalantzan jartzen, ezin dute.

E) Ekarpen interesgarrienak ARALAR alderdiak egin ditu. Bere dekalogoa oso mamitsua da. Baina komunikazio-bideegileen interes faltarekin topo egiten du behin eta berriz. Ikustear dago irekitzan ari den hauteskunde garai honetan gai ote den bere mezua helerazteko.

F) NABAIren ideologia ezkertiarra, aldarrikapen teorikoez haratago, erakusteko dago. Zinez ez dut uste PNV, EA, eta hainbat "independiente nabai-zale" ezkerrekoak direnik. Ez dut kritika moduan esaten. Eskuin humanista (ez basatia) erabat ulergerri egiten zait aukera ideologikoa bezala. Liberalismo eskuindarrak tradizio handia du gure artean. Zer esanik ez sozialdemokrazia deiturikoak. Beraz ez dut eskuinaren ideologia demonizatzen edo iraintzen, ez eta gutxiago ere. Bestalde, ez naiz ni inor horretarako. Baina "ezkerrekotzat" jotzen badugu gure burua, ekintzez eta ekimenez erakutsi beharko dugu. Ez gara esaten duguna, egin-egiten duguna baizik.

G) Ezker Abertzale tradizionala bere legetasuna lkantzen ari da. Beste eztabaida batean murgilduta dago. Une honetan, aldarrikapen toerikoez haratago, ez du ekarpen ezkertiarrik egin. Ulergai egiten zait niri egoera.

Beraz, Eskuin haizeak nagusitu dira. Ni neu ezkerrak zeresan handirik baduelakoan nago. Zegatik ez da entzuten?

Besarkada bat, lagunak

PSOE-ren IKASGAIAK

2010-11-14T11:30:00.000-08:00

Ez du axola Marruecosek saharatarrak hiltzeak; ez du axola Marruecos-ek ONU-ren esanak ez batetzeak; ez du axola Marruecos-ek giza-eskubideak ez errespetatzeak; ez du axola Espainiar estatuaren betekizun historiko-politikoak erabat ahazteak; ez du axola... "Lo más importante son los intereses de España en Marruecos" (Zapaterok, 2010ko azaroan).
Zapateroren esanak beste PSOEko buruzagik eurena egin dute lehenago. Egun hauetan harro-harro Gonzalez-ek esandakoak irakurtzea besterik ez da. Hemen ere ez du axola; garrantzitsuena Espainiaren interesak dira.

Hurrengora arte,

ANIMATU DEZAGUN PLAZA

2010-11-10T10:17:00.000-08:00

Kaixo Lagunak:

Lanarekin distraitu xamar ibili naizen ezkero nahikoa utzita eduki dut gure dibertimendu arin hau. Denbora dexente sartu gaberik egonda, gaurkoan funtzio berri bat atzeman dut Blogger honetan. "Comentarios" izena duen bekain berria agertu zait. Honen bidez irakurleek egiten dituzten aipamenak kudeatzeko gaitasun batzuk eskaintzen dizkit programak. Ohartu naiz irakurle lagunek bidalitako aipamen batzuk SPAM moduan jasota zeudela. Horren ondorioz ez ziren argitaratu. Ezabatu diet aipatu etiketa eta argitaratu izanen dira. Orain artekoan SPAM izate kontsiderazio horiek programari atxiki behar zaizkio. Arraioa, hauek dira hauek inbentoak!!

Zertan gaude lagunak?

Badirudi PPSOEK, EAJk lagunduta, paketze eta normalizazio prozesuari galga jarri diotela. Azken aste honetan denboraren (tempo famatua) kudeaketarako estrategian aldaketak egin dituzte. Ez dute presarik; ez dute azkar joan nahi. EAJ-ren aurkakotasun gogorrik ezean, badirudi hurrengo Foru eta Udal hauteskundeetarako aurrekoen estrategia errepikatu nahi dutela. Alegia, Batasunari hauteskundeetan parte hartzea eragotzi nahi diote, alderdi honek bere bozkak zakar-ontzira botako dituen esperantzan. Hala bada, abertzalegoaren kalterako; etxe-kalte beti ere.

Euskal Erkidego Autonomoan, poliki-poliki, alderdi guztiak bere tokia hartzen ari dira. Fronte espainiarra kontsolidatzen ari da, EAJ-k Madrideko protagonismoa eta laguntza dela medio, bere tokia hartu du. Batasuna etengabe komunikabideetan, etengabeko sufrikarioan (epaiketak, atxiloketak,...). Besteok, borroka latzean burua agertzeko. Nahiko lan!!

Nafarroan, UPN inaugurazioak bata bestearen atzetik, Sanz eta Barcina eskuz-esku. Alderdiaren aparatoa lasai, haien atzetik. Hauteskundeen emaitzak espero bezain onak ez badira, etxe guztietan bezala, espektakulu polita ikusiko dugu. PP ere bai, lasai dago; lehenengo enbidoa du hau, ezer ez galtzeko eta askotxo irabazteko. PSN, egun duenarekin konformatu egiten dela ematen du. Etxe honetan ere bai, emaitzen zain. Ikusiko dugu hauteskundeen ondoren Jimenez, Lizarbe, eta enparauek zernolako bidea hartzen duten.

Abertzalegoaren baitan, zer?

Zer ondorio izanen du Batzarreren ateratzeak NABAI-ren emaitzetan? Ez dakit, ez dut uste eragin negatibo handirik izanen duenik, baina eragin positiborik seguru ezetz. Edonola ere, emaitzez aparte, proiektua bera ahuldu delakoan nago ni. Ezkerreko sentiberatasuna duen alderdia joanda, korronte honetako pentsamoldea ahuldu egiten da NABAIren baitan. Eta, Aralar izanik koalizioaren jatorria, ezkerreko ideologia gure oinarri teoriko-praktikoa dela ez genuke eztabaidatu behar. Ezkerrean ainguratuta al dago egun NABAI?

Lagunak, hauteskundeak hurbiltzen ari direnez, dibertimenduari eusteko proposamena egiten diot nire buruari. Politikazaleok dibertitu ere bai egin behar dugu politikarekin. Animatu dezagun plaza!

Ondo izan

BERTALANFFY

2010-10-01T11:47:00.000-07:00

Ludwig Von Bertalanffy (1901-1972) biologo eta filosofo ospetsua bezain interesgarria da. Austrian jaio zen; Inbsbruck hiriko Unibertsitatean doktoradutza egin ondoren Estatu Batuetara joan zen. Kanada, Europa eta Estatu Batuetan nazismoak eragindako harat-honata batzuk egin ondoren, 1954an azken herrialde honetan finkatu zuen bere bizitza. Unibertsitate eta zientzia gizona, oso emankorra eta sakona.

Nire hausnarketari dagokionean bere “Sistemei Buruzko Teoria Orokorra” izan da aspalditik gehien erakarri nauena. Xaloa bezain aberasgarria, erraza bezain erabilgarria; errealitatea interpretatzeko oso tresna polita. Ez naiz luzatuko teoria honekin zeren eta idatzi honen ondo-ondoan baduzue honi buruz nik baino askoz ere gehiago dakien batek: Google jaun-emakumea oro-jakintsua. Jaun/emakume hau lerro hauek baino askoz ere eskurago duzue, laguntzeko beti gertu. Hari galdetu eta luze, argi eta zabal azalduko dizue “Sistemen Teoria Orokorra”.

Sistema bateko atal batean eragiten dugun aldaketak sistema oso-osoan izaten ditu ondorioak, nahi bada edo ezbada. Horretaz bada, politika sistema mugitu, mugitzen da. Izan ere sistemaren elementu batek eragin bat integratu du eta haren ondorioz, mantso izanda ere, aldaketak antzematen hasi dira. EAJ-k ADOS ekimena martxan jarri du, aldi berean eskubideen aldeko manifestazioarekin bat egin du. Sistemaren beste espazio batean EAJ ez beste alderdi abertzaleak Gernikan elkartu dira bakearen alde eta bakegintza adosteko. Beste espazio batean mugimendu hauek dardara eragin dute eta ikusi behar zertan bilakatzen den dardari hau, baina, ezin uka BAKEA eraginak sistema mugiarazi duela. Gainera, mugitzen ez denak, sistematik espazio infinitura jaurtikia izateko arriskua du. Beraz, nahi ez badu ere, mugitu egin beharko du sistemaren mugimendu hauekin bat egiteko. Baina… hain doa mantso! Bien bitartean segitzen du sufrikarioa.

Abian-abian trantsizio batean gaudelakoan nago ni. 45 urte eta gero, berriz tokatzen zaigu trantsizio berria bizitzea. Ea oriangoan zementazio hobea ematen dugun.

Besarkada bat, lagunak

EREDU EKONOMIKOA ETA BESTE

2010-09-20T09:18:00.000-07:00

Gaurkoak bi atal ditu: bat, agindutakoa, eredu ekonomikoa; bi, zertzelada labur batzuk egungo egoera politikoari buruz (izan ere nire politika-zaletasunak galbidean narama: ez badut zerbait idazten leher egingo naiz).

1.EREDU EKONOMIKOA

Lehengo batean eredu ekonomikoari buruz idatziko nuela agindu nuen. Hain zuzen ere ekonomia da politikaren esparruan batzuk eta besteak bereizten gaituen ardatzetako bat. Alegia, ardatz honen arabera bereizten ditugu “ezkerrak” eta “eskuinak”. Azken urteetan oso debate interesgarria zabaldu egin da ezkerra-eskuina dikotomia eta ekonomiaren artean dagoen erlazioari buruz. Izan ere eredu komunistaren porrotak batetik eta praxi politiko-ekonomikoa bestetik eredu ekonomiko bakarraren baitan bizi behar dugula sinestaraztera eraman gaitu. Zenbaitetan “beste mundurik” EZ dela bideragarri ematen du. Hala al da?

Nire lagun batek ezkerra eta eskuinaren arteko diferentzia azaltzeko oso eredu erraza erabiltzen zuen: 10 irabazten badituzu, eskuinak bi kentzen dizkizu eta azpiegituretan inbertitzen ditu; ezkerrak ordea, 10 irabazten badituzu, hiru kentzen dizkizu, bi azpiegituretan inbertitzen ditu eta bat politika sozialetan.
Azalpen murritza da, baina oso erabilgarria diferentziak ulertzeko. Noski, gerora datoz kontzeptu bakoitzak dakarren soka luzea: nori kendu, zenbat da “bi” edo “hiru” pertsona batzuentzat eta besteentzat, progresibotasuna (gehiago duenak, gehiago ordain dezala), azpiegitura, “politika soziala” kontzeptuaren esanahia,. Beraz, ez da bakarrik 10etatik bi ala hiru kentzea, kentze horri kudeaketa politikoa erantsi behar zaio.

Eskuinak estatuaren esku-hartzea ahal den gehiena ahultzearen aldekoa da, bizitzaren erregulazioa merkatuaren baitan utzita. Eskuinarentzat bizitzeko beharrezkoak ditugun zerbitzuak negozio aukerak dira, beraz merkatuak erregulatu behar ditu: osasuna, hezkuntza, pentsioak, zahartzaroaren ongizatea. Zerbitzu hauek gozatu ahal izatea, pertsonaren merezimenduaren ordaina da, gozamen pribatua alegia. Estatuak, negozioak egiteko behar diren eta merkatuak erregulatu ezin ditzakeen azpiegiturez arduratu behar du soilik: giza-segurtasuna, justizia sistema, garraio azpiegiturak,… eta negozioa ez diren besteetaz (pobreekiko gutxienezko karitatea esate baterako). Propietate pribatua eta negozioa ahal den gehiena babestu behar dira, pertsonaren baitarekin lotuta baitira. Pentsamolde honen arabera estatuak bi kendu behar dizkizu, negozioak egin ahal izatea bermatzeko.

Ezkerrak aldiz, estauaren esku-hartzea aldarrikatzen du, propietate pribatuaren banaketa konpentsatzailea egiteko. Era berean, bizitzeko beharrezkoak ditugun zerbitzuak, eskubidetzat jotzen ditu. Beraz estatuari egokitzen dio zerbitzu hauek pertsona guztientzako izatea, duin eta kalitatezko: hezkuntza, osasuna, pentsioa, zahartzaroaren zainketa,… Beraz, estatuak gehixeago kendu behar dizkigu eskubide diren zerbitzuak guztiei zabaltzeko. Aldi berean ezin ditu bazter utzi eskuinarekin bat eginda, zaindu behar dituenak: segurtasuna, azpiegiturak (autopistak, kaiak, aireportuak, eraikin publikoak,…). Kalitatezko zerbitzuak eta pentsioak guztientzako bermatuz, ongizatearen estatua eta berdintasunaren aldeko politikak bermatzen dira. Ezkerraren arabera zerbitzu hauek ez dira merezimendu pertsonalaren ondorioa edo borondatearen araberako karitatezko oparia, pertsona izateari lotutako eskubide unibertsala baizik.

Ezkerra eta eskuinaren arteko desberdintze honi, baloreei lotutako beste diskurtso dilematikoa gehitu ahal genioke: erlijio-askatasuna, dibortzioa, abortoa, homosexualitatea, e.a.

Aintzat hartzen badugu honako errana: “egin-egiten duguna gara, ez gara, ordea, pentsatu edo idazten duguna”, GALDERA ZERA DA: NON KOKATZEN DUGU GURE BURUA? non kokatzen dira PP, PSOE, EAJ-PNV, Aralar, EA, EB, eta gainerakoak?

Badirudi krisitik ateratzen ari garela; zein atetik ateratzen ari ote gara, eskuineko ala ezkerreko atetik?

2.POLITIKA, POLITIKA,…

>Mugituko al dira alderdi unionista-nazionalista espainiarrak ETAren azken mugimenduen ondorioz? Sukaldean akaso? Hauteskundeak pasata?
>Gustora dago EAJ Madridek eskaini dion protagonismoarekin. Argi dago alderdi hau agintea eskutan dagoelarik oso ondo egiten duela bere lana, baina oposizioan hanka motz. Oraingo honetan hainbat esamolde etortzen zaizkit burura: “urrititik hamalau, bertara joan eta lau”, “gaurko ogia, biharko gosea” edo “hartzaren besarkada” famatua.

>Gustatu zait niri “diagnostikoa” egiteko ideia. Protagonismoa eman dio, eta PSE-ren irmotasun zentzugabea agerian utzi du. Iniziatiba hartu du, modu disimulatuan. Ez nuke nahi itxurakeria hutsa izatea.

>Honek, txarrerako ala onerako, zera uzten du agerian: ETAren mugimenduek, era batera edo bestera, hauteskundeetan eragina izanen dute. Azken batean sistema batean bizi gara.

>NABAI, NABAI, NABAI,… Zer ote zinen eta zer ote zara? Batzarre deskolokatuta dago edo deskolokatu dute, baina egun hauetako deklarazioen ondoren argi dagoena zera da: uztailetik pasatzen da, aulkiaren truke, ala beste beso batzuetara joan beharko du (IU-ra akaso?). NABAIko beste inork, ez Aralarrek ez EAJk ez Eak, ez du aintzat hartuko bere eskakizunik, ezta urrik eman ere. Badirudi beste alderdiei ez ziela axola Batazrre joatea. Eta hori erabat logikoa da, nire ustez, EAJ edo EAren tokitik begiratuta, baina ARALARrek, ezkerrekoa izanik, bidelaguna galduko du ezkerreko politikak bultzatzeko. Noren eskutan geratzen da NABAI Batzarre alboratuta?

>Azken inkesten arabera Nafarroan UPNk eta PPk lor dezakete gehiengo absolutua. Bestela, UPN-PSN izanen da gobernu koalizioa. Alegia, UPN egon, egonen da Nafarroako ejekutibo foralean. Zalantza da zein hartuko duen bidelaguna: PP ala PSN. Nire irudikoz PP izanen da. Hauek horrela NABAI boterearen aldeko borrokatik kanpo geratzen da. Eragiteko gaitasunik geratuko al zaio? Barne-batasunari eutsiko al dio?

Hurrengo arte lagunak. Besarkada bat.

BERRI ONAK

2010-09-06T11:22:00.000-07:00

Kaixo lagunak:
Berri onak ekarri ditu iraila honen hasierak. Ez nahi bezain onak, hala ere. Edonola ere nik zalantzarik ez dut berri ona dela ETAk biolentziaren geldialdia iragartzea. Oraindik zalantza askotxo dago (nik ez ditut errepikatuko), baina… beste “baina”rik jarri nahi ez dudanez, puntua jarriko dut..
Nire ustez bueltarik gabeko prozesua da (hala izango al da behingotik!). Borroka armatuak ez du aterabide politikorik, ez du justifikazio etikorik ezta politikorik ere eta, gainera, min handi-handia egiten dio Ezker Abertzale zaharrari. Horretaz oharturik oraingo kontua bukaeraren nolakotasuna kudeatzea, batzuek eta besteek, izango da. ETA poliki-poliki ahulduz joan da eta galbidean sartu du bere burua.. Ez dut uste ezer negoziatu ahal izango duenik (politika mailan, noski, ezer ez; eta desarmeari eta preso eta errefuxiatuen egoera eta ber-gizarteratzeari buruz, ikusi behar).
Abertzale ezkertiarrok aldi berri baten atarian gaude. Gainerakoentzat aldaketa garrantzitsu eta pozgarriak izango dira, hala nola bizkartzainik gabe bizitzea eta askatasunean bizi ahal izatea, baina ez aldaketa politiko nabarmenik. Izan ere, ETAren ahulezia dela medio bere desagerpenak ez du inolako aldaketa politiko nabarmenik eragingo sektore unionista zein abertzale eskuindarren esparruan. Are eta gehiago ETAren jardunak aukera eman die bere posizio politikoa finkatzeko, eta horretan iraungo dute, epe laburrean behintzat.
Ezkertiarrok gaude deituta gure burua argitu eta birkokatzeko. Gure harreman eta sare politikoak definizio berriak izango dituzte. Orain ere bai, ikusi behar nola kudeatzen dugun egoera berria.

NIRE LAGUNEI ERANTZUNEZ

Nafarroako Ezker Abertzalearen izatea oso arazotsua izan da beti. Aralarren proiektua oso ondo definitua dago, baina definizio hau lausotu egiten da NABAIren baitan. Horretaz diot nik Ezker Abertzalea errotzeko aukera galtzen ari garela.
Neuk, “NABAI : bai ala ez?” galderari erantzuna eman izan diot Aralar Nafarroaren baitan behin baino gehiagotan, nire arrazoibideak agertuz. Gaurko une politikoa oso berezia da eta debate sutsu honi ez diot alferrrikako egurrari eman nahi. ARALAR alderdi demokratikoa da, behar den bezala hartuta daude erabakiak. Nafarroan hartutako erabaki taktikoak ez datoz bat nire ikusmoldearekin, baina gehiengo zabal baten iritzia ordezkatzen dute. Beraz hartutako erabakiak ahalik eta hobekien kudeatzea opa diet horretarako ardura bizkar gainean hartu dutenei.
Nire buruari galdetzen diot une politiko honetan NABAI ren gainean inolako debate estrategikorik ireki ote daitekeen. Ezezkoan nago; hauteskundeak atarian daude, programak zehaztu behar dira, zerrendak lantzen hasi beharra dago,… Ez da momentua erabakiak berraztertzeko, erabakitakoa ahalik eta hobekien kudeatzeko baizik.

Lagunak, beste une politiko, edo beste tokia, beharko dugu “NABAI: bai ala ez?” gai interesgarriari buruz eztabaidatzeko.

Ea hurrengoan, agindu bezala, “Proiektu ekonomikoa” gaiaz aritzeko betarik ote dudan.

Besarkada bat, lagunak.

GALDERA TRANPADUNA

2010-08-31T05:03:00.000-07:00

Aralarrek krisiari aurre egiteko eta aberastasuna banatzeko neurri fiskal berriak proposatu ditu

http://www.aralar.net/aktualitatea/aralarrek-krisiari-aurre-egiteko-eta-aberastasuna-banatzeko-neurri-fiskalak-berriak-proposatu-ditu

ETA NAFARROAN, ZERGATIK EZ?

Besarkada bat lagunak

BEROTZEN ARI GARA

2010-08-25T10:38:00.000-07:00

KAIXO LAGUNAK!!!

Jarrai dezagun politika zaleok ezbaidan eta iritziak elkar trukatzen.

Aurrekoan esan nuen dibertimendu honetan alderdien araberako analisia egin beharrean, gaika egingo nuela. Zailagoa da, noski; izan ere ezertan aditua ez, eta saltsa askotan, ordea, partaide. Hala ere ez diogu erronakari bizkar emanen eta helduko diot agindutakoari. Dena den, dihoala aurretik hiru iruzkigileei nire esker beroena debatea animatzearren. Tokatzen zaidan gaia jorratu ondoren agertuko diet irakurle lagunei nire iritzia esaten dutenaren gainean.

EKONOMIA. Beti bezala hau dugu hauteskundeetako ardatzetako bat. Oraingo honetan, joan den legealdian zehar krisia pairatzea tokatu zaigu, eta oraindik ere horretan gaude. Espainian PSOE-ri tokatu zaio krisia kudeatzea; Euskadi Erkidego Autonomoan, krisiaren aldi gordinena PSOE-PSN-ri tokatu zaio ere bai, eta Nafarroan UPN-PP-CDN koalizioari (egun UPN-ri).

KRISIAREN SORRERA. Esan bezala ez naiz ni ekonomilaria. Beraz barka ezazue nire ausardia gai zail honi buruz aritzearengatik, baina behin eta berriro ari naizen moduan honakoa politika era atsegin batez konpartitzeko bidea besterik ez da; ez du inolako traszendentziarik. Ausartu gaitezen beraz!

Zerk sortu du krisia? Badirudi kapitalismoak berezkoak dituen krisdi zizkliko horietako batean gaudela. Oraingo hau azken aurrekoak baino gogorragoa akaso, baina ziklikoa delakoan nago. Krisi hau azken urteetako gehiegikeriek sortu dutelakoan nago; duela bi-hiru urte ematen zuen aberasten ari EZ zena, tontua zela (ni neronek esate baterako). Etxe salerosketa zela, inbertsio arraro bat zela, merkatu emergente batean eginiko salerosketa... guzti hauek zirela medio ematen zuen gu ez beste guztiak aberasten ari zirela: a zer etxeak, zer kotxeak, zer bizi-erritmoa,... Badirudi, norbaitek, nonbaiten (G-8an? Espainiako kostaldean eginiko aberatsen bileran? Munduko Brokerren foroan? Non ote?) aski zela erabaki zutela, eta... gaudenean gaude. Bene-benetan nik krisi honetan ez dut antzeman inongo aberatsa pobretu egin denik, inongoa ere ez. Eta hala gertatu bada, jaso dituen konpensatzioak, irabaziak eta gainerakoak ARALAR osatzen dugun alderdike guztiok gure bizitza osan irabazi dezakegun guztia baino handiagoak izan dira. Sumatu al duzue benetako kapitalistarik kezkaturik??
kapitalismoak ber-orekatzeko krisia behar du. Eta hori desorekatzen den edozein izakiri gertatzen zaio, baita neroni ere bai.
Egoera honetara iritsita, makurrena zera da, krisiak sektore ahulenek ordaintzea. Eta are eta makurrago, ezkerreko alderdiak horretan konplize izatea.
Kapitalismoa berrorekatzeko behar izan diren mugagabeko dirutzak guztiona diren kutxa publikoetatik atera dira. Kapitalismoaz gehien baliatu direnak, bere probetxu propiorako, ez dute sosik ere eskaini; ez dute ezer arriskatu; are eta gehiago, gerrateetan gertatu bezala, gehiago aberastu direla ematen du (begiratu banku pribatuetako emaitzei).
Alderdi politiko nagusien jarduna oso pobrea izan da. Ez da ideiaren eztabaidarik izan; inoiz ez da eredu ekonomikoa ezbaian jarri; eta inplementatu diren politikak "kapitalismo gehiago" leloari jarraitu diote. Kapitalismoaren krisia, kapitalismo gehiagoz sendatu egin da. Noski, guztion diruaz injektatu da "kapitalismo gehiago" hori. Nafarroako eredua begi bistan dugu: guztiona diruaz bultzatzen da kontsumoa (lehioak, kalderak, kotxeak aldatzeko diru-laguntzak, e.a.). Zorabio honetan Zerbitzu Publikoek ere bai ederki ordaindu dute (Hots, benetako kapitalistek ez dute zerbitzu pulikorik erabiltzen; beraientzat zerbitzu pribatuak daude eta: ikastetxeak, osasun-zentroak, ziurtasuna, etxe-laguntzaileak,...) Baina guztionak diren zerbitzuak ederki mugatu egin dira: ikastetxeetan irakasle gutxiago,; osasun zentroetan mediku eta erizain gutxiago; eriak artatzeko aldiak murritzagoak; pertsonak dependenteen laguntzak geldituta; e.a. Diru bilketa eskasagoaren aurrean PSOEk emandako irtenbidea penagarria bezain lotsagarria izan da: Funtzionarioei soldata jeistea eta pentsioak izoztea. Gizateriaren kontrako neurri ekonomikoak asmatzen jarri eta zail gertatuko litzaidake neurri hoberik. Neurri atzerakoiak, eskuin-mutur zaleak, irudimen eskasekoak, errazkeria-zaleak,... Martxan jarritako neurri guzti-guztiak eskuin muturrak diktatutakoak dira. PSOE-PSE-PSNri ausardia eta irudimena falta izan zaizkio.
Neurri guzti hauek krisiari buelta emanen diote, ez dut dudarik, baina bueltaren ondotik aberatsak aberatsagoak izanen dira eta pobreak pobreagoak. Gainera, bidean, urteetako borroketan lortutako hainbat eskubide ezabatuta geratuko dira. Ba al dago lotsa handiagorik bere burua ezkerrekotzat duen alderdi batentzat? Agian bai, iretenbiderik ez ematea esate baterako. Beldur horren aurrean PSOEk nahiago izan du eskuinaren errezeta hartu.

NOLA ATERATZEN GARA KRISI HONETATIK??

PSOEk (PSE-PSN eta beste PSOE guztiak) zerbait galduko du baina duin eutsiko dio. Eskuinaren errezeta honek emaitza azkarrak ematen baditu, PSOEK jasoko ditu sariak. Hala ere eragindako sufrikarioa hainbatekoa izan da ezen eta PPk aurre hartuko dio Espainian. Diferentzia txikiaz nire uztez, baina aurre hartuko dio.

PPk aski izan du zain egotea. Ezer egin gabe Espainiako gehiengoa izanen du. Gainera bere eredu ekonomikoa indartuta dago. Besteek egin diote lan zikina. Hala ere bere irabazpena ez da hainbestekoa izanen, larri ibiliko da eta besteen laguntza beharko du bere programa ateratzeko.

ABERTZALEEN ESKUINAk ez du ekarpen nabarmenik egin eztabaida honetan. Bere esku-hartzeak beste klabeetan izan dira. Nire ustez aukera ederra galdu dute programa berritzailea agertzeko. Seguruenik PSOEk segitutako politika ekonomikoarekin ados egon dira (Espainiako bozketa garrantzitsuetan hala agertu dira). Horrek zaildu die benetako alternatibatzat agertzea.

ABERTZALEEN EZKERRAK. Nire ustez ARALARrek oso politika positiboa eta eraikitzailea egin du krisi honetan. Programa ekonomiko laburra eta sendoa plazaratu du. Politika fiskalaren inguruko eztabaida eragin du. Aralarren arazoa ez da idearioaren falta, herriarengana iristeko zailtasuna baizik.

NABAI. Zein da NABAIren programa krisi ekonomikoaren aurrean? Nik behintzat ez dut ezagutzen.

_____________

ERANTZUNAK

Fernando: agur bero bat eta segi dezagun aurrera!
Ezkerpareta: Ados nago zurekin Aralarren lana txalotzerakoan. Galdera zera da: lorzen ari al gara gizarteratzea? NABAIri buruz ni ez naiz hain baikorra. UPN ez dut ahulduta ikusten, oriandik. Luzera, jakina, PPrekiko desmarkeak kalte handia eginen dio, baina ondokoetan eutsiko dio. Barcinak kontsebadurismoak eskatzen duen guztia eskaintzen du: ordena, tradizioa, erlijioa, obra publikoa, populismoa,... Nafarroako kontserbadoreen bozkak bilduko ditu. Kontuz gero!!
Altsasutik: Ezin da hobeto azaldu! Nola saldu da hain merke ezkerreko proiektu polit hau?

ESKERRIK ASKO ETA HURRENGORA ARTE. BESARKADA BAT.

BUELTAN NAGO

2010-08-17T02:53:00.000-07:00

Kaixo lagunak:
Aspaldiko!
Joan den ikasturtearen bigarren erdian lanaz lepo ibilita, bazter utzita izan dut dibertimendu hau. Oraingo honetan arinxeago nabilelarik saitu behar dut nire ahalegintxoari segida ematen.
Interesgarri datorkigu ondoko ikasturte politikoa. A zer erronka: estatuko hauteskundeak, horretaz gainera udal eta aldundikoak Euskadin eta udal eta gobernukoak Nafarroan. Aitortu behar dut, nire lotsarako, Ipar Aldeko hauteskunde egutegia ez dudala menperatzen. Edonola ere Euskal Herriko Hego Aldeko potere gune askotako aulkiak jokatzen dira epe laburrean. Abuztuaren bukaeraren bueltan hasiko dira makinak martxan. Irratiari so eginez dagoenekoz hasiak direla antzematen da. Oporretatik bueltatu diren politikariak ez dira denbora galtzen ari eta hasita daude hauteskunde usaia darien deklarazioak.
Bestalde, inork aitortzen ez badu ere zer edo zer badago sukaldeetan eta sukalde ez diren besteetan; Aralarrek EAk eta Batesunak ez dute sukaldearen beharrik izan, orain arte behintzat.
Neuk antzematen ditudan gakoak:
1/ Krisi ekonomikoa.
2/ Gizarte eredua (eredu ekonomikoa)
3/ Pakegintza
4/ Unionismo espainiarra eta nazionalismo desberdinen arteko tentsioa.

Joku konplikatua bezain interesgarria. Politikazale garenontzat benetan kilikigarria.

Zernola daude kokatuta alderdiak?
PSOE (PSE eta PSN barne). Ez dut uste esaten den bezain gaizki dagoenik. Hartutatko neurri ekonmikoek eta kanpoko laguntzek emaitza onak ekartzen badituzte, gora egingo du. Kontuz gero!! PPk ez du erraza izanen. Ez naiz ausartzen Euskadin eta Nafarroan zertan dauden esaten. Euskadin oso kudeaketa arrunta egiten ari direla iruditzen zait, ausardirik gabea, kontserbadorea eta motela. Baina euren biktimismoak zein politika anti abertzaleak (terrorismoaren biktimek lagunduta) izan ditzakete bere hauteskunde ondorioak, positiboak eurentzat. Nafarroan idem; PSN-k, UPNren makulua izanik, oso jarrera antzekoa du.

EAJ-PNV. Hamaika burutako alderdia da une honetan. Oraindik-orain bere tokiaren bila dabilela ematen du. Urte eta erdia pasa da eta ez du oposizio toki egokirik topatu. Bestalde, Urkullu lan ona egiten ari da, baina EAJ-ren eredua dela eta, Ibarretxe joanez geroztik buru baten faltan daudela ematen du. Irudiaren garai hauetan izaera honek ez du lagungarri. Dena den, oraindik orain garaiz daude. Bozka-zolari ("suelo electoral") delakoari eusten badio, bueltatuko da galdutako potere guneetara luze gabe.

BATASUNA. Nahi nuke bide politikoan murgiltzea, indarkeriari uko egitea, amnistia negoziatzea, eta ezker abertzale integratu baten jaioaldi berri baten protagonistak izatea. Egonen al da hurrengo hauteskundeetan? Bere siglekin ez dut uste, zoritxarrez.

PP. Gora egingo du, PSOEren kaltetan. Segituko du oraingo rola bereetan, baina are eta indartsuago.

UPN. Lehen indarra Nafarroan. Barcinaren eskutik PPrekin gobernatuko du. Politika antiabertzaleak segida izanen du nire erresuma errepublikanoan.

ARALAR. Euskadin itzalita dago. PSEk ez dio kantxarik eskaintzen; Unionismo eskuindarraren aldekoek are eta gutxiago. Bereak eta bi egin behar ditu burua ateratzeko. Dena den orain arte politika zuzena eta koherentea egiten ari delakoan nago. Izanen al du isladarik hauteskundeetan? Nafarroan galduta dago NABAIren barruko eztabaida antzuetan. Nik neronek Nafarroan ezker abertzale sendo eta integratua (ARALAR, eredu eta izena) errotzeko aukera historikoa galdu dugun ustea daukat.

EA. Bejondeiela!

BATZARRE. Azkenik NABAIren baitan izango dira. Azken momentuan.

UPyD. Euskadin... ez dakit. Nafarroan, ezer ez.

Ibili eta buelta ABERTZALEOK ez gaude unerik onenean. Badugu zer pentsatu eta zer proposatu. Nafarroak segitzen du gure suspentsoa izaten. Noiz gaindituko dugu? Euskadi zertan gauden ez dakigu. Ondoko hauteskundeek emango digute guztion neurria.

Espainia proiektua hausten bada, Kataluniak eraginda izanen da. Hango nazionalismoak bide zibil eta politikoari eutsi zion aspaldi, eta arian-arian, lortzen ari da.

Ondoko sarreretan, ez alderdiak, baizik gakoak (krisi ekonomikoa, gizarte eredua, pakegintza, e.a.) aztertu beharko ditugu.

HURRENGO ARTE LAGUNAK!!

Besarkada bat,

Irakurlerik badago, seinalerik eman dezan, faborez. Beti ere motibagarria suertatzen da.

Partida aurrera doa

2010-02-20T04:47:00.000-08:00

Agur t’erdi lagunak; agur t’erdi Josu eta ongi etorria eztabaida plaza txiki honetara.

Lehengo batean “noticias” taldean oso artikulu polita irakurri nuen Euskal politikan jokatzen ari den xake partidaz. Nik mus jokoaren metafora erabili nuen; kazeta honetan xake partidarena. Agian bigarren hau irudimentsuagoa da. Dena den bene-benetako partida jokatzen ari da Euskadi Elkargo Autonomoan EAJ eta PSEren artean, lidergo politikoa saria delarik. Mugimenduak oso-oso pentsatuak dira, partida mantsoa da, eta beti ere norbere posizioa zainduz. Momentuz inongo jokalarik ez du pieza askorik galdu, nago ni, eta partida erabat irekita dago oraindik. Ez dut desorekarik ikusten.

EAJ oso ondo zaintzen ari da bere esparrua. Oraindik ez du bere erregea (edo erregina) erakutsi. Eta hori oso arma baliagarria izan daiteke gerora. Ikusiko dugu errege/erregina izendatzearekin asmatzen duten.

PSE ere bai oso ondo zaintzen ari da bere erregea. Peoiak eta bestelako figurak la ona egiten ari dira erregea babesteko lan honetan. Baina ezin da irabazi, defentsara jokatuz. Noizbait hasi beharko dute erasoan. Orduan jokatuko da fase erabakiorragoa, hauteskundeei begira.

PP ere bai ondo laguntzen ari da errege babesteko lanean, baina bere interesak deskuidatu gabe: Euskara, Hezkuntza,… berezkoak dituen gaiak behin eta berriz aipatzen ditu, protagonismoa ez galtzeko. PSEk beharrezkoak direnak eskaintzen dizkio: telebista, oihartzun mediatikoa, e.a.

Eta besteok?

Zurekin ados nago erabat, Josu, Aralarren proiektuari dagokionean. Izugarri lan baliagarria, ezkertiarra eta abertzalea, egiten ari da Euskadi Komunitate Autonomoan. Nik zera diot, oposizio lan polita egiten ari delarik, Aralar arriskutsua da PSErentzat, ezkerreko politika aldarrikatzen duelako eta koloreak ateratzen dizkiolako gobernuari. Arriskutsua da EAJrentzat, oposizio lanetan protagonismoa ken diezaiolako. Arriskutsua da EArentzat, alderdi honetako bere burua sozialdemokratatzat jotzen duen sektorearentzat Aralar erreferentzia politiko gardenagoa delako. Arrsikutsua da Ezker Abertzale tradizionalarentzat, Aralarren bidea, oinarri programatikoa eta antolakuntzazkoa erabat gardenak eta definituak direlako; gainera indarkeriarekiko jarrera ez du zirrikiturik erakusten. Arriskutsua da EBrentzat, aurreko arrazoi guztiengatik. Arriskutsua da oro har unionistentzat proiektu independentista gardena eta demokratikoa proposatzen duelako.

Testuinguru honetan Aralarrek biderkatu behar du bere lana, oihartzun soziala lortzeko. Inork ez dio mesederik egingo. Beraz, jakina, lan egitea tokatuko zaigu.

----------- * ------------

EA galbidean sumatzen dut nik ere bai. Irautea du helburu bakarra une honetan.

EB, mugen arteko espazioa okupatu nahirik berriz ere. Baina, ba al dago espaziorik Aralar eta PSEren artean?

---------- * -----------

Josuk “sirenaren kantuak” aipatzen ditu eta zera esaten du: Aralarrek muzin egin behar diela kantu hauei. Ados nago, bai. Baina galdera bat botatzen dizut: Nafarroan nondik datoz “sirena kantu” hauek? Euskadi Elkargo Autonomoan Aralarrek errepresentatzen duena, ez al dugu errepresentatu behar Nafarroan ere bai?

---------- * ----------
Momentuz utzi dezagun Ezker Abertzale tradizionalaren baitan egiten ari den eztabaidaren ondorioak, eta ETAren jarrera, hurrengo baterako. Plaza publikoan gaia aipatzeko goizegi ote den nago ni, baina eragile politiko garrantzitsua da EAO eta ezin alboan utzi. Hurrengo batean baietz!

Zuen erantzunaren zain, besarkada bat, lagunak.

MUSEAN

2010-02-11T11:40:00.000-08:00

Musean ari dira alderdiak. Tanto guztiak banaka-banaka jokatuz; arretaz eta ordagorik jo gabe, badaezpadaere.
Foraletan ikusiko da zeinek irabazten duen lehenengo txikia. Hemendik 3 urte luzeetara partidaren bukaera. Urruti samar begiztatzen da oraindik, tentsioa eta kontzentrazioari eutsi beharko zaio ordura arte.
---------------
Galdera bat: benetan nahi al dute kolaboratu PSEk eta EAJk? Pose mediatikoa ote? Elkar bultzaka ari dira argazkitik elkar ateratzeko.
---------------
PP eroso; egurra bi aldeetara.
---------------
EB mugitzen ari da. Bere leku naturalera bueltatzen da. A zer mina egin dion potereaz baliatu nahi izateak.
----------------
Aralar lagun desorosoa bilakatu da guztientzat. Bukatu dira inongo mesede edo begirunerik, inoiz izan baldin bada. Bukatu da ETB, prentsa eta gainerakoa. Borroka latza egin beharko du burua agertzeko.
-----------------
EA?
-----------------
Nafarroa, Nafarroa... NaBai, Nabai... zain segitzen dugu. Azken eternitatean bezala.
-----------------
Besarkadaren aurretik: Ba al gaude paketik hurbilago?

Orain bai, besarkada bat

NAFARROAN ARALARREK ZABALDU DU MELOIA

2010-01-22T07:07:00.000-08:00

Kaixo lagunak:
Nafarroako politikan une garrantzitsu baten atarian gaudelakoan nago. Euskadikoan ere bai, abertzaleen arteko elkarlanari dagokionean.

Nire ikuspuntuaren arabera hona gakoak:

1.NaBai-ri ailegatu zaio zirt edo zart egiteko momentua. Izan ere kideen arteko etengabeko liskarrek agerian uzten dute bestelako egitura eta akordioen beharra.
2.Aralarrek mahaiaren gainean jarri du proposamen politikoa eta antolakuntzazkoa. Horretaz gainera epe bat seinalatu du, martxoaren 15a. Izan ere hateskundeetarako prestatu egin beharra dago eta ez dago gehiago atzeratzerik.
3.NaBai-ko hainbat kiderentzat egungo egoera oso erosoa da, gain-errepresentatuta daudelako. Alderdi nagusiak (Aralar) ere bai elkarketaren sinergiak hartzen ditu, baina besteek baino ordain handiagoa egiten duela ematen du.

Baina...

-Batzarre desoroso dago NaBairen baitan, koalizioaren politika ezkertiarra epeltzat jota. Bestalde, abertzaleen eraikuntza nazionalak, naziogintza, ez du hainbeste motibatzen. Erribera aldean PSNko adar ezkertiarrekin eta PSNtik kanporatutakoekin lanean ari dira. Izan ote daiteke koalizio berri baten abiapuntua, NaBai alboratuta?
-EAren egoera oso iluna da. Hamaika bat batetik, Ezker Abertzale ilegalizatua bestetik, poloaren mamua... Errespeto handia diot alderdi honi. Behingotik argitu beharko du bere jarrera NaBairi dagokionean. Une larri honetan nahiago dut kritikarik ez egitea. Dena den zera esango dut: nire ustez bidea erratzen ari dira. Politikan ez dago bi aldeetan egoterik.
-EAJren porrota historikoa Nafarroa izan da. Ba al da NaBai bere toki naturala?

Koalizioaren kideek behartuta daude posizioa hartzen. NaBai egungo Nafarroako bigarren indarra izanik, ez dago ukatzerik une garrantzitsu batean gaudela.

Bi hilabete interesgarri izanen dira hurrengoak.

Bestetik:

PSN ahaleginetan ari da bere burua UPN-tik desberdintzeko hauteslegoari begira. Lan zaila du, erabakitzeko momentuetan eten gabe UPNrekin batera posizionatzen delarik. Errezago zaio NaBaitik bereiztea: aski du behin eta berriz FSEkiko jarrera aipatzea.

IUNk ezkerretik aurreratu nahi du PSN. Ematen du PSNren politika posibilista eta zentralistak "chance" eman diezaiokeela. Hala ote?

Eskuinetik ere bai badago zer ikusi: zer erlazio izango dute UPNk eta PPNk bereizketaren ondoren? zein izango da bakoitzaren gizarte oinarria? Zer egin behar du CDNk?

Lagunak, ikusten duzuen bezala gure Nafarroa maitea benetan berezia da. Eta oriango honetan puzzle politikoak inoiz baino pieza gehiago dauzka. Ez al dugu inoiz ikasiko?

Euskadi Elkargo Autonomoari buruz, hurrengo batean.

Eta hurrengo batean ere bai azalduko dizuet nire jarrera pertsonala NaBairi dagokionean. Orain ez da momentua jarrera pertsonalak leku publiko batean agertzeko. Barruan badakite nola pentsatzen dudan.

Besarkada bat irakurle guztiei,

HIRU DESIO

2010-01-05T03:34:00.001-08:00

Agur t'erdi lagunak:

Hasiera eman diogu urte berriari.
Koalizio unionistak gobernatzen ditu Nafarroa eta Euskadi. Abertzaleok ez gara gai izan gure indar sozialaz baliatzeko. Datorren urte honetan eragitearekin konformatu beharko dugu.

Datorren urtea aurre-elektorala izanen da. Hauteskundeei begira ikusiko ditugu mugimenduak. Nire ustez une honetan berrikuntza nabarmenena zera da: Koalizio Unionistak ilegalizatutako Ezker abertzalearengan ematen ari den eztabaida. Disimuluak-dismulu, guztiok horri begira gaude. Errespetuz jarraitzeko asmotan nago.

Data hauetan ohikoa izaten da urterako desioak plazaratzea. Neuk ere bai halaxe eginen dut:

1.- Pakea Euskal Herrian.

Arrazoibide etikoak oinarrian, arrazoibide politikoek ere bai horren aldeko hautua bultzatzen dute. Egun, borroka armatuak sufrimendua ekartzeaz gainera, eraginkortasun politikoaren murrizketa eta higadura etengabea erakartzen ditu.

2.- Amnistia.

Euskadiko Elkargo Autonomoko Gobernuaren Delegatuak izaera politikoa aitortu zion ETAri. Nik bat egiten dut berarekin.
Ez dut uste une honetan bapateko amnistia ematerik dagoenik, baina badago pausoz-pauso egin daitekeen askatasunerako bidea. Amnistia graduatua, adostutako deserriratzeak barne.

3.- Ezker Abertzalearen berregituraketa.

Pake politikoa ezarrita, Ezker Abertzale osoak bere barne ika-mika ergelak baztertu beharko ditu eta barne egituraketa demokratikoa oinarritzat hartuz, alderdi bakar baterantz jo beharko du. Zenbat eta lehenago ekin, orduan eta hobe. Zertan gaude, pake giroan, EA ilegalizatutakoa, Aralar, Hamaika1, EA, Alternatiba, Batzarre, Batasuna, Abertaleen Batasuna, eta beste?

Urte berri on lagunak.

AZALPENAREN BEHARRA

2009-12-24T02:56:00.000-08:00

Kaixo lagunak:
Eskertuko nuke EAJ-k azalduko balizkigu, eta ondo azaldu ere, honakoak:
-"Guggenheim-bi" egiteko proiektua. Ni bezalako hiritar arrunt batek ez du ulertzen Biosferako erreserba den leku zoragarri honetan halako azpiegitura egiteko temakeria. Gai honetan PSEren jarrerak sozialagoa ematen du. Orain arte agertutako arrazoibideak ez naute bat ere konbentzitu.
-EAJren Aurrekontuaren aurreko jarrera ez da ondo gizarteratu. Politikook dena ulertzeko gaitasuna izan dezakegu (apoak eta sugeak irensteko gai gara), baina hiritar arrunt batentzat zaila egiten da ulertzea zergatik eman zaion PSEri holako garaipena, urte luze batez iraunen duena. EAJren mezua ez da ondo iritsi.

Azalpenaren zain geratzen gara.
_______________.________________

BIHOTZ-BIHOTZEZ, ZORIONAK ETA URTE BERRI ON!!

AITAREKIN BIDAIAN

2009-12-17T11:00:00.000-08:00

Gaur Hika Taldearen "Aitarekin Bidaian" antzezlana gozatzeko parada izan dut. Blogga irakurtzen duzunoi antzezlana ikusteko aukerarik baduzue, ez hutzsik egiteko aholkatzen dizuet. Izan ere irakurle gehienak, helduak zarete, urteetan aurrera sartuak, eta zuen gurasoekiko harremana, komunikazioa, elaboratuta duzue: zenbat min, zenbat maite...
Lana, tripetatik ateratako minaren adierazpen garratza iruditu zait. Eta ni jokoaren erdian sumatu dut nire burua. Ondoan nituen batzuek ere bai, baten bati negar malkoak isuri zaizkio. Guzti hau nire bizitza pertsonaleko momentua erabat harrapatuta dagoelako lan honetan agertzen den korapiloan, nire aurrekoei begira zein nire ondorengoei.
Zorionak HIKA taldeari eta lanaren idazleari.

___________ : __________

Lehengo batean Gne lagunak Blogga baztertuta dudala esan zidan; ez dudala elikatzen. Arraioa! momentuan ez nion erran, baina ez nuen uste lagun maiteak bloggaren berri bazuenik ere. Hau entzunda, gutxienez astean behin zerbait idazteko parada hartzeko agindu diot nere buruari.

___________ : ___________

Zertan gaude? Neronek baneki!!
Udal eta Foru hauteskundeak izkinaren bueltan daude. Alderdi guzti-guztiak urdurik daude. Giro nahasia eta korapilatsua. PSEk etengabe aurrekoak baino gehiago egiten dutela, haiek baino hobeak direla, haiek baino... aldarrikatzen ari dira. Euren buruarekin konfindantzarik ez.

Bestalde, Frentismoa gero eta nabariagoa; lotsa eta kupidarik gabea.

EAJ birkokatzen, poliki poliki asmatzen ari delakoan nago. Horretaz gainera kilkir-kaiola: EB, Aralar, EA, Hamaika1, Ezker Abertzalea, Poloa,...

Nafarroan: lehengo lepotik burua. NAbairen baitan urak gero eta nahasiagoak. PPN ahul (oraindik) baten ondoan, UPN lasai antzean. PSNk UPNren itzalpeko apurrekin konformatu egiten da, Madriletik agindu bezala. Eta abertzaleok debereak egin gabe, gure buruaz lotsa eginda bageunde bezala. Konplexuak uxatu eta arrokeria gehiagoz jokatu behar dugulakoan nago.

_________ : __________

TDT ren sarrera dela eta, egun hauetan ez dut nire etxe partikularrean ETB ikusten. Neronek ere ez nuen uste hainbeste falta sumatuko nuenik. Izan ere ez dago beste telebista euskaldunik. Hori gabe eskaintza osoa erabat espainiartuta geratzen da. Erremedioa jarri beharko dugu etxean.

___________ : ___________

Ea aste bete pasa gabe berriz idazten dudan.

Besarkada bat,

Espainiar konstituzioa

2009-12-07T00:34:00.000-08:00

Egun hauetan Espainiar Konstituzioaren urtemugaren zurrunbiloan bizi izan gara. Sumatu dut alderdi espainiarren harrotasuna eta mendeku griña. Azken batean konstituzio hau euren garaipen politikoaren adierazle nagusia da. Betiereko totema, irmoa eta ukiezina. Azken batean tresna honek errazten die euren proeiktu politikoarekin bizitzea, bestenei iniolako aukerarik eman gabe, besteak erabat bazterturik. Gu eta "haiek" erabat kontsagratuz.

Konstituzio honek itotzen nau.

Zer aukera daukat baldin eta nire proiektu politikoa konstituzio honek jarritako muga frankisten kanpokoa baldin bada? Zer aukera daukat nahiz eta nire proiektua demokratikoa izan?

Utikan!!

P.S. Vienan egon ziren nazionalista espainiarrek,

Pakea, errespetoa, hitza eta lasaitasuna

2009-12-01T23:21:00.000-08:00

Eskerrik asko Jose Luis lagunari bere animoengatik. Jarraituko dugu tarteka-marteka hizketan blog honen bidez. Eta beste inork ere bai animatu nahi badu, hemen gara gure hausnarketak partekatzeko.

Egoera politikoa egonkortzen ari ez delakoan nago. Jose Luisek dio agintaldi osoan ez dela egonkortuko. Ez dakit ba!

Ezegonkortasun honek ondo ez goazen pertzeptzioa zabaltzen du. EAJ-k bi aldeak agertzen ditu: pragmatismoa, erabaki sozio ekonomikoetan; egurra, erabaki politiko hutsetan. PSE-k bere legitimizazioarekin duda-mudatan. Gainera estatu aparatoen gehiegikeriak eraman eta zuritu behar ditu. Aukeran, zalantza asko eta ziurtasun eskasa PSEren aldean. PP oso eroso dago Komunitatean, baina Kataluinan eta Espainian dauzkaten zorrak ezin dituzte hemengo egoerarekin kitatu.

Abertzaleen artean, batasun eza oraindik ere.

Dena den, zerbait ari da Batasuanaren inguruan. PSOEk sarekada politikoen bidez oso argi utzi du zereginik ez dela ETA deustatu gabe; eta Batasuna politika egin nahi du, ETAz ahaztuta. Nire ustez luze joko du oraindik, guztion zorigaiztorako.

Bien bitartean, Batasunaren duda-mudak medio, Ezker Batua berrindartuta sumatzen dut eta Aralarrek bere bide propioa jorratzen segitzen du.

Nafarroan urak nahasita dabiltza. Hurrengo hauteskundeek argituko dute zer gertatzen den NAbai koalizioarekin, nola egituratzen den eskuinaren esparrua, zer lortu duen PSNk eskuina nabarrista ultraeskuindarra lagunduz, eta, oro har, zein den bakoitzaren gizarte-babesa.

Egia esan, panorama beti bezain nahasia eta harrotua. Pakea, errespetoa, hitza eta lasaitasuna; horra niore leloak.

Ondo izan lagunak

Zalantzatan egon naiz

2009-11-18T13:23:00.000-08:00

Hona nire zalantza: "bloga itxiko ote nuen". Izan ere lanak gero eta denbora gehiago kentzen dit eta nahikoa utzia izan dut esperimentu txiki hau,
Segitzea erabaki dut. Ibili eta buelta seguruenik ez da jada inongo irakurlerik izanen eta niretzako bakarrik idazten dudan pertzepzioa daukat. Berdin dio!

BESTE ZALANTZA: Koalizio monarkikoak agintaldi osoa izanen da Ajuria Enean eta Nafarroako Parlamentuan, bainan... kontsolidatzen ari ote da? Edo lubakia gero eta handiagoa da?

2009-09-10T07:26:00.000-07:00

Kaixo lagunak:

Ikasturte politikoa ireki da eta nik ere bai irekiko dut blog anarko hau.

Uda beroa izan dugu, PSE-k ezarri duen politika errepresibo berriaren ondorioz. Lau haizeetara zabaldu dute uda honetan ehuntaka salaketa bidali diotela Audientzia Nazionalari, terrorismoaren apologia akusaziopean, aurreko urtean 14 bakarrik izan ziren bitartean. Ah zer lorpena!! Nahiez gero milaka ere bai egin dezakete, aski dute presoen aldeko agiri bat edo beste agertzen duten milaka hiritarretako batzuk, orain arte baino gehixeago, identifikatu eta salatzearekin.

Politika ekonomikoaren inguruan, zaharrak berri. Aurreko gobernu aldian mamitutako ideia zahar batzuk beste ideia sasi-berri batzuekin nahasi eta.. tira! Eredua aldatzeko, egokitzeko edo berritzeko, ideia eta ausardia falta nabarmenak dira.

Ematen du benetako jokoa 2010ko aurrekontuen inguruan izanen dela. Eta, bestalde, Madriden jokatuko dela zergen igoeraren eskutik. Ikusiko…

EAJ-PNV-k lortu egin du protagonismo politikoa, PSE-ri aurre hartuz, bere lankidetza iraunkorrerako eskaintzarekin. Berriro diot, ikusi behar nola kudeatzen duten PSE-k emanen dion ezezko disimulatua.

Nafarroan ere bai, zaharrak berri. Udazken honetan hasiko dira mugimendu esanguratsuak datozen hauteskundeei begira. Alderdi abertzaleek badute zer mamitu eta zer erabaki. Urruti ikusten dut nik inolako aukerarik gobernuan egoteko edo sostengatzeko. Alderdi espainiolen artean, euskal nazionalisten kontra dauketan elkarren arteko laguntza-hitzarmenaz gain, borroka politiko latza zabaldu da gizarte-zentralitatea okupatzeko. Horretan dabiltza CDN, PSN, PP eta UPN. Bien bitartean euskal nazionalistak debereak egin gabe, nire ustez.

Ezker Abertzale zaharrak badu zer pentsatu eta zer erabaki. Ez diet esango zer egin behar duten, baina Lekeitiokoa hondazuloa zabaltzeaz gain, euskaldunon sufrikarioa luzatzeak besterik ez dakar. Eta, gainera, espainioleei mesede galanta egiten die euren politika errepresiboa zuritzeko.

Hurrengo arte, lagunak.

Mugi-mugi!

2009-07-08T01:25:00.000-07:00

Kaixo lagunak:
EAJ-k mugimendua egin du, orain arteko noraeza utziz eta jarduna bide politikoan zentratuz. Giro politikoan berehala antzeman da jokaldia. Batzuen eta besteen deklarazioen tonua aldatu egin da berehala; hasiera eman dio benetako partidari. Asmatu egin du.
Oso mugimendu interesgarria izan da; oso indartsua, bera bezalako alderdiari dagokion neurrikoa. Batetik Euskadirekiko konpromisoa adierazten du bere lankidetza eskainiz, eta bestetik patata beroa uzten dio PSEri.
Uda ailegatzear dago eta astia hartuko dute batzuek eta besteek erantzuteko. Oporren ondoren aurrekontuen proiektua eztabaidatu beharko da. Orduan ikusiko dugu partidaren garapena.
Nire hipotesia hau da: PSEk ez dio helduko konbiteari; ez da izango nahi ez duelako, ezin duelako baizik. Atzera egiterik ez duen bidea aukeratu zuen eta aurrera egin behar du. Bere aliatua PP da eta hauek baldintzatuko diote geroa. Ez dut uste Zapateroren egoerak Euskadiko norabide politikoan aldaketarik eragingo duenik. Une honetan Zapaterorentzat oso kaltegarria litzateke komunitateko aliatua eta norabide politikoa aldatzea; Espinia aldean bozka askoren galera ekarriko lizkioke, PPri bidea erraztuz.
EAJ-ren mugimendu honek PSEren espainolismo muturrekoa agerian utziko du. Era berean Zapateroren bakardadea ageriagokoa izanen da.
Baina, EAJ-k kudeatu behardu PSEren ezetza disimulatua. Ez da erraza izanen.
Bien bitartean, Nafarroan, bi arte barru izanen diren hauteskundeetarako praestatzen ari gara. Oso udazken interesgarria izanen dugu:
UPN-PPren arteko harremana argitu beharko da. Biek ala biek aski ongi dakite banaketak kalte handia, handiegia, ekar diezaiekela.
PSN-k, UPN-tik politikoki desberdindu beharko du. Gai izanen al da? UPNren besarkada hartzaren besarkada izan da orain arte. Nafarroan ere bai PSN politika espainolista lehenetsi du, beste aukeren gainetik. Iraupena eman dio aukera honek, ez ordea poterea eskuratzeko aukerarik.
NABAI bere barne egituraketa findu beharko du eta barne liskarrak bideratu, bestela bereak egin du. Aralarrek, NABAIko alderdi nagusia dena, nahikoa lana badu bere papera argituz eta bere egitura propioa sendotuz.
EA zertan dagoen ez dakigu. Batzuk EA ofizialean, beste batzuk (gutxi batzuk, ene ustez) Alkarbidean. Une honetan NABAI-ren egituratik kanpo ez luke aukerarik izanen. Bereak eta bi eginen dituzte NABAIri eusteko, baina zerbait utzi beharko dute bidean.
EAJ oso txikia da Nafarroan, Eszisio garaian egitura osoa EAra pasa baitzen. Nafarroan, EAJ eta EA ren arteko berbaturaketa egin beharko litzateke, Euskal nazionalismoaren indar ekuin-zentrista sendoa osatuz.
EB, gutxika-gutxika protagonismoa galtzen ari da, aukera politiko handien itzalpean. Inoren lurrean ibiltze horrek testimonilismoaren ertzean egoten behartzen du.
Batasuna? Laberintoaren irteeraren bila. Irteerarik ez badu aurkitzen, bi urteren buruko hauteskundeetan beste beharaka izanen du. Nafarroan, gero eta eragin gutxiago du.

Politika-zaleontzat udazken interesgarria, alajaina!

Beste bat arte, lagunak.

Nahi eta ezin

2009-07-06T05:13:00.000-07:00

Kaixo lagunak:
Aktore politikoak nahi eta ezintasunean dabiltzala iruditzen zait.
PSE, politika zeharkatzailea egin nahirik, baina PPrekiko morrontzara eta politika frontista egitera behartuta.
EAJ, erreferentzialtasuna eta lidergo politikoa hartu nahirik, baina egin ez dakien oposiziora kondenatuta dago.
PP, Gobernukide eta erreferentziala izan nahirik, baina bigarren lerrora pasaarazi dute.
BATASUNA, legala izan nahirik, baina zokoan entzerratua.
ARALAR, protagonismoa hartu nahiri, baina ohiartzunik topatu gabe.
EA, Abertzaletasunaren erreferentzia izan nahirik, baina urtzen ari da.
EB, inon ere ez.
UPyD, nork daki?
Mapa politikoa "baina" hauek barneratu ondotik egituratuko da. Izan ere gaurkoan nahasmen handia antzematen dut, oraindik orain. Alderdiek ez dute barneratu bere benetako errealitatea. Zenbat eta lehenago egin orduan eta eraginkorrago izanen direlakoan nago.
Nire ustez PSE azkar barnneratuko du politika frontistaren egikaritza. Ez du beste aterabiderik. Naturaltasunez hartuko du, Nafarroan hartu duten bezalaxe. Azken batean, alderdiaren lider batek esan zuen bezala "El PSE trabaja para España".
EAJ galduago sumatzen dut oraindik. Ezin dute luze segitu noraeza honetan. Ez dute barneratu oposizioaren egikaritza. Ez badute jokabidea argitzen, PSEri lana erraztuko diote.
PP erosoago dago. Luze gabe hartuko du Arabako diputazioaren bidez, eskatzen ari den protagonismoa.
ARALAR, lasai dago. Baina ezin du luzatu hauteskundeen ondorengo motelaldian. Zaia izanen zaio independiente izatearen eta besteekiko lankidetzaren arteko orekari eustea. Alderdi nagusien "edo nirekin edo nire kontra" exijentzia kudeatu beharko du.
BATASUNAk, laberintoaren aterabidea non dagoen badaki. Erabaki beharko du haren bila joanen den edo galduta segi nahi duen.
Alderdi guztiek oporraldiaren beharrean daude, euren barneari begiratu eta geroa argitzeko.
Hala izan bedi!

Hurrengo bat arte, lagunak.

Europear hauteskundeak: ba dago zer erranik

2009-06-08T03:14:00.000-07:00

Pasa dira hauteskundeak. Ondoriorik?
Beti badago ondoriorik; ondoriorik ez izatea, ondorioa izanen bailitzake. Hona nireak:
1. Abstentzio handia izan da (% 55 inguru) Oro har, hiritarrok urruti ikusten dugu Europa politikoa. Askotxo dago egiteko, oraindik. Nik aspektu bat azpimarratuko nuke: Europa politikoaren identitate falta. Hauteskunde eta gobernu sistemak ez dute laguntzen identitatea sendotzen, eta honen ondorioz, parte hartze ahula dugu oraindik. Edonola ere neu baikorra naiz; pausoz pauso eraikiko delakoan nago. Orain arte honelako batasun politikoen eraikuntza oso arazotsuak eta, askotan ere bai, gerrateen ondorioa izan dira. Europa eraikitzen ari da bake garai batean, nazionalismoen gainetik. Erraza ez da izanen, beraz. Baina, prozesu endogenoa da eta bake bidean egina. Lortutakoa ez da makala.,
2. Eskuinaren nagusitasuna erabatekoa izan da. Azken batean ezkerraren krisiaren isla. Garai honetan ezkerra ez da gai izan aukera ideologiko berritzailerik plazaratzeko. Eskuinaren politiken jarraitasuna, besterik ez du egin. Bere aldarrikapena azken urteetan ahuldu den babes sozialari eustea besterik ez da izan. Aukeran, gutxitxo.
3. Espainian, Europako joera baieztatu egin da. Baina PSOE eta PPren arteko diferentzia ez da oso nabarmena izan. Beraz, ezpatak goiti daude. PSOEren krisiaren kudeaketak, eta krisiaren bilakaerak, eragingo dute datozen hauteskundeen emaitzetan. PP ez du lortu garaipena aseguratzen dion distantziarik; eta PSOEk kezkatzeko arrazoirik badu.
4. Euskadiko Komunitate Autonomoan, EAJ-k eutsi dio momentu zail batean. Dena den badu zer pentsatu. Izan dituen emaitzek analisi pausatua eskatzen dute. Lerro hauetan faktore baten eragina azpimarratuko dut, faktore nagusia izan ote den esan gabe. Hauteskundeei ekin die liderrik gabe. Irudietan oinarritzen den politika garai honetan ez da makala erakutsi duten ausardia. Dena den emaitza hauek zer pentsatu eman behar diete. Ezin dute luze atzeratu Ibarretxeren ordezkoaren hautapena, ofiziala hala ofiziosoa.
Nafarroan testimonialismoaren esparruan daude. EAJ-ren etengabeko suspentsoa. Noizbait hausnarketa sakona egin beharko dute lurralde honi buruz eta historikoki izan duten estrategia-errakuntzari buruz.
5. PSEk emaitza onak izan ditu. Hautesleriak ontzat jo du egin duten aukera gobernuari begira; nahikoa kontent egoteko. Baina, hala ere, ez dute aurkaria gailendu; eta nazionalizmoa, oraindik orain, oso present egon da, hauek bezalako hauteskundeetan. Beraz, aurrera segitzeko motibagarri. Nafarroan kontsolidatu egin dira bigarren indarra bezala. Burua altxatzen ari dira, Nafarroa-Bai koaliziaren kaos ideologikoak lagundurik. Oro har, PSOE Hego Euskal Herriko indar nagusia da.
6. PPk Euskadin baleko emaitzak izan ditu; besterik ez. Gobernuaren aurreko jarrera PSEk kapitalizatu du. Zer pentsatu emango die, eta ez ninduke harrituko akordioaren bi aldeen arteko diferentziak eta profil baxuko liskarrak areagotuko balira. PPk distantziak markatu beharko ditu eta akordioari lortutako lorpena begitandu. (Ai ama, Arabako diputazioa!). Nafarroan oso emaitza onak lortu dituzte. Lehen indarra izan da, zalantzarako zirrikiturik utzi gabe. Interesgarria geratzen da Nafarrontzat PP eta UPNren arteko erlazioa datozen hauteskundeei begira.
7. Ezker Abertzale zaharrak oso emaitza onak lortu ditu. Hor daude, ilegalizazio eta bestelako erasoen gainetik. Dena den, inork ez du bere burua engainatu behar: hauteskunde hauetan oso erraza izan da II-ri bozkatzea. Nire ustez halako erantzun-bozka mugimendua izan da. Hau da, Aralarri joandako bozka askotxo, oraingoan IIri joan dira, nire inguru hurbilean ikusi ahal izan dudan bezala. Nire ustez, egon bada bi arimen artean mugitzen den hautesle sektore garrantzitsua. Dena den alderdi nagusiek aintzat hartu beharko dituzte eman diren zenbakiak. Ezkutatzeko joera izanen da, baina zenbakiak hor daude. Nire ustez emaitza hauetan lagundu egin du hauteskunde garaian pertsonen kontrako atentaturik ez izanak (zorioneko egoera dudik be).
8. Aralar/EA-k helburua bete dute, parlamentaria eskuratzen lagunduz. Hauen hautua oso pragmatikoa izan da, pragmatikoa ez den hautesleri batetan oinarritzen direlarik. Argi geratu da Aralarrek bide luzea egitekoa duela, baina Irazabalbeitiak eginen dituen hilabeteak oihartzuna emanen dio alderdiari. Ezker Abertzalearen beste arimarekiko harremanak, beti arazotsuak eta baldintzatzaileak izanen dira. Hala eta guztiz ere, mapa politiko zail honetan, zerotik hasirik espazio bat zabaltzeak badu meritua; eta ez gutxi. Oraingo hauetan ere bai, bere espazioa zabaldu du. EAk nahikoa lan badu barruari begira.
9. UPyDk ere bai bere tokitxoa egin du. PPtik eta PSOEtik edanez eta haiekiko inkonformismoa jasoz. Identitate ideologiko propiorik lortzen badute, baliteke bere tokia izatea, mapa politikoaren zentroan.

Honenbestez:

- Europak proiektu politiko erakargarria landu behar du.
- Eskuinaren haizea nagusitu egin da argi eta garbi. Ezkerra krisian itota dago.
- PSOE eta PP, ezpata goiti. Berdinketa teknikoa alde baterantz jo du, baina ez atzera bueltatzeko adina.
- EAJ-k egoera berrian kokatu behar du. Muebleak salbatu ditu, baina zer pentsatu eta zer eginik ba du.
- PSEk pozik egoteko emaitzak izan ditu. Nafarroan, PSN-k emaitza onak izan ditu ere bai.
- Euskadin, PP bere horretan dago, ez aurrera eta ez atzera. Nafarroan, beti bezala, nagusi.
- Ezker Abertzale zaharrak badu bere esparru propioa.
- Ezker Abertzale berriak bere lana egiten ari da, poliki-poliki baina gera gabe.

Konklusio bat:
Euskal Herria eraikiko bada lau hanken gainean eginen da (Esker-eskuin espainiarra / ezker-eskuin euskotarra), edo ez da eginen.

Eta galdera bat
Posible al da lau hanka hauek ados jartzea proiektu konpartitu batean?

Gobernualdia hasi da

2009-05-15T03:52:00.000-07:00

Politika kontu batzuk:

BAT // Ibarretxeri agur egin diogu eta Lopezi ongi etorria. Hamar egun aski izan dira urak bere lekura itzultzeko. EAJren aldarrikapenak gozatu egin dira eta PSEren errebantxismo tankerako adierazpenak desagertu. Joko politikoa hasi da. Bazen garaia!!
PSEren lehenengo mugimenduak lan-taldeak aldatzea izan da. Hala dagokio eta halaxe egiten ari da. Aldaketa begi bistakoa izan dadin saiatzen ari da, pertsonak aldatuz. Ondo jokatzen ari delakoan nago. Noski, ikustear dago euren kudeaketa gaitasuna tokatu zaien aldi zail honetan.
EAJ oposizio lana egiteko lekuan zentratzen ari da poliki-poliki. Ondo mugatuko duelakoan nago. Orain arte egindakoa ontzat ematen dut nik:
1.- Oposizioa lideratzeko irudi baten agerpena atzeratu du. Ez da unea. Ondo neurtutako erabakia. Baina ezin izanen du gehiegi atzeratu. Luze gabe gizarteak berak eskatuko dio galderari erantzutea. Momentuz ongi dago; baina ongi neurtu beharko dute legealdiaren "denbora": ez goizegi; ez beranduegi.
2.- Ditxosozko web orriarekin PSEk eginiko hanka sartze galanta, ondo markatu dute. Honela jokatuez gero, protagonismoa ez zaie faltako. Goizegi izan daiteke beste motatako ekimenak hartzeko.
3.- Negar egiteari utzi diote. Ondo.

BI//Greba polititzatzen ari da. Hasieratik izan du kutsu politikoa, baina egunez egun are eta gehiago hartzen ari da. Alderdi politiko guztiak posizionatu egin dira honen aurrean, ia ia sindikatuei eurei protagonismoa kenduz. Nere ustez soberazko arrazoiak badira greba egiteko. Politika zaleok adi egonen gara PSEren kudeaketa lanarekin. Lehenengo testa izanen da beraientzat.

HIRU// Penatuta nago, oso. Krisi ekonomiko honetan, ezkerra (adierazpen zabalean) erabat desagertuta dago. Ez dago proposamen berritzailerik; ez dago debate ideologikorik. PSOEk berak mahaian jarri dituen neurriak, eredu ekonomikoa indartzea beste helbururik ez dute. Bizitzen ari garen krisi honek kapitalismoa indartuko du. Krisi artifiziala!!

LAU// Pakegintza. Zerbait gertatzen ari den susmoa dut. Ez dut uste une hauetan inor fribolizatzen ausartuko denik gai honekin. Beraz, friolizatzen ari ez badira, esan direnak esan... Nik ere ez dut fribolizatuko. Esateko asko nuke, baina hobe isilik egotea publikoa izan daiteke pantaila honetan.

Animoak eta ekin, pakea behar dugu eta.

Besarkada bat politika maite duten lagun guztiei. Hurrengo arte.

Agur t'erdi Lehendakari

2009-04-30T08:53:00.000-07:00

Juan Jose Ibarretxek agurtu gaitu.
Niretzat Lehendakari haundia izan da. Jakin badakit pertsona publikoengan dimentsio guztiak batera doazela eta hala baloratu behar direla, baina blogak nork bere buruari baimen bereziak ematekoak dira, eta halaxe egingo dut. Beraz Ibarretxe jaunarengan bi dimentsio bereziko ditut: politikoa eta gizakoia.
Dimentsio politikoari dagokionez, gaur egun Euskadik duen egoera sozio kulturala oso ondo adierazten du bere ibilbidea. Oro har Herrialde hau modernizatu egin da, ekonomia garai berriei egokitzeko dinamika integratzen jakin izan du, Hezkuntzak oro har hiritarren behar eta eskakizunei erantzuten die, osasun zerbitzuek eusten diote giza-eskakizuna asebetetzeari, gizarte zerbitzuak zabaltzen ari dira, azpiegiturak garatzen,... Oro har "ongizate-egoera" hiritar gehienengana iritsi da.
Euskal kultura, euskal hiztunak, euskal identitatea alegia, integratu egin da. Nazionalizmoari buruzko debate soziala normalizatu egin delakoan nago. Diktadura batetik etorririk eta izugarrizko transformazioak ezagutu duen herria izanik, globalizazioaren inertziari alto egin dio eta identitate propioari eutsi. Ez da makala!
Batzuekin eta besteekin gobernatzen eta akordioak egiten jakin izan du.
Zer falta izan zaio ibilbide honetan? PAKEA. Estatutu berria eta kontsultaren ekimen politikoak, biak ala biak, pakerantz orientatuko proiektu ondratuak izan direla deritzot.
Ez dut ahazteko Juan Joseren duintasuna Espainiako Kongresuan bere Estatu berriarentzako proiektua defendatzerakoan. Duintasuna... eta bakardadea. Baina Euskadiren identitatea aurretik.
Gizatasunari dagokionean ez dut uste bera bezain gizakoia eta ondratua den inongo pertsonek zanpatuko dituenik Ajuriaeneko alfonbrak. Gizon gardena, egizkoa eta sentibera.
Bestalde oso pertsona azkarra (listoa), sen politikoaz jantzia. Ederki mugitu da etsaiez osaturiko basoetan. Hauteskundeak irabazi zituen. A ze alukeria hainbat eta hainbatentzat. Agian baita alderdikide askorentzat (ez irabaztea, bai ordea halako diferentziaz irabaztea).

HURRENGO ARTE, LEHENDAKARI!!

Kritikak hurrengo baterako utziko ditut. Egia esan gaurko agur giroak ez dit errazten kritika zeregina betetzea.

Eta agur berro-bero bat irakurle berriei. Hemendik konbidapena luzatzen diet Juan Jose Ibarretxeren agintaldia baloratzeko; nik erantzungo.

Besarkada bero bat denei.

Hiru galdera eta gehiago

2009-04-20T06:10:00.000-07:00

Kaixo Lagunak:
Aspalditxo ez dut ezer idatzi. Izan ere zalantzetan ibili naiz segituko ote nuen asamakizun honekin. Atzo lagun batek bloga irakurri duela esan dit eta horrexek animatu nau beste aldi batean aurrera egiteko.

Hiru galdera:

1. Noiz arte eutsiko dio PSE-k PPren presioari Arabako aldundian aldaketa gauzatzeko?
Nire iritzia: urte honen barruan egingo da, uda ondotik.
Beste iritzirik?

2. Gai izango al da EAJ oposizio trinkoa egiteko?
Nire iritzia: Bai.
Beste iritzirik?

3. Gai izango al da PSE frontismoren lerroa hausteko eta zeharkako politika egiteko?
Nire iritzia: Ez. Ez du bidaiderik topatuko.
Beste iritzirik?

Eta beste galdera asko:
Bukatu al da ziklo nazionalista Euskal Komunitate Autronomoko gabernuan, aldi luze baterako?
Gai izango al dira alderdi txikiak bere eremua berrantolatzeko?
Hurbil al dago pakea?
Gai izango al dira Ezker Abertzaleko bi arimak elkarrenganatzeko?

Eta dibertimendu txiki bat:
Inork al du kotileorik Patxiren agendan dauden izenei buruz?

Hurrengo arte, lagunak. Besarkada bat denoi.

BIHURRIKERIAK

2009-03-13T10:11:00.000-07:00

Kaixo irakurleak.
Airean dago oraindik Arabako lurraldeko EA eta PSE ren artean disputatzen ari diren azken parlamentaria. EA-rentzat 2gna da; PSErentzat 25gna litzateke. Bientzat garrantzitsua, EArentzat presentzia bikoiztea da; PSErentzat UPyDrekiko loturaren menpekotasunetik libratzea da.
Horiek horrela López tematuta dago lehendakaritzarekin. Bestalde, preso dago ere bai. Aparato konstituzionalista oso-osoa atzetik dago eta berak ezin die hutsik egin. Poterera eramanda, ondoko urteetan txotxongilo modura badarabilte, PSErenak egin du. Aldez edo moldez legealdia bukatuko du, zer erremedio! Baina hitzarmen ezkuturik ez bada (eta litekeena da), batzuen eta besteen artean itoko dute.
Zapatero bera preso geratzen ari da jokaldi honetan.

Aralar aske geratzen da bere proposamen politikoak plazaratzeko. Agian ere izanen al da gai bere ahotsa etzunarazteko!!

EAJ haserre dago. Eta haserretzeko arrazoiak badauzka. Izan ere PSOE-k traizioa egin dio. EAJ-k, Loiola eta Arantzatzuko peke-saioen porroten ondotik, txintik erran gabe alderdien legea onartu zuen, terrorismoaren kontrako borrokarako tresnatzat eta marko horretan kokaturik. Kanpaina osoan ez du lege honen kontrako adierazopenik egin, horretarako bortxaturik izan ez bada. Eta garrantzitsuena, legea izanik ere, hauteskundeak zilegiztatu ditu bere parte hartzearekin. Gainerakook atzetik, berdin egin dugu. Baina, hara non, PSOE-k legearen erabilpen bihurria egin du , eta terrorismoaren kontrako borrakaren markotik aterata, legea bera poterea eskuratzeko probetxatu du. Nago, joko arauak hautsi egin dituela eta marra pasa egin duela. Hau ez da soilik terrorismoaren kontrako borroka, hau da gizartearen borondatea faltsutzea eta laburbide tranpatiak erabiltzea poterea eskuratzeko eta EAJ kanporatzeko.
Gehiegi, txo! dena den, Nafarroakoa izan ondoren, jakina, ez dira fidatzekoak. Inoxente, inoxente gu guztiok!!

KINIELA -bigarren partea-

2009-03-03T02:11:00.000-08:00

Agur t’erdi irakurle jator hori (dagoenekoz bi baditut):

Igaro da hauteskunde eguna eta jada emaitzen inguruko berriak zaharkituta geratu dira. Dena den hau ez da eguneroko berriari atxekitutako egunkari komertziala, erakuskeria pitin batez blaitutako pertsona baten denbora-pasa baizik. Honenbestez ez nau hainbeste arduratzen gaurkotasunak.

Denbora-pasa honetan alderatuko ditut nire kiniela (ikus aurreko sarrera) eta izandako emaitzak. Hona:

ALDERDIA NIRE KINIELA EMAITZA ALDEA
EAJ-PNV ------ 28---------30------- +2
PSE-EE --------24--------- 24-------- =
PP------------- 15 ---------13 ------- -2
ARALAR -------3 -----------4 ------- +1
EA -------------2 -----------2--------- =
EB------------- 3 -----------1 -------- -2
UPD -----------0 -----------1--------- +1

Goazen orain analisiarekin:

EAJ-PNV – Bejondeiela!! Zoriondu beharrean nago. 28 eman nizkien eta 30 lortu dituzte. Alderdiak politika sena eta heldutasuna erakutsi ditu. Barne liskarrak ondo kudeatu dituzte, eta behar zen unean trinko agertu dira liderraren inguruan. Ibarretxe jaunak lidergo sendoa erakutsi du. Hainbeste urteren ondoan honelako emaitzak lortzea oso meritu handia erakusten du eta, bestalde, zenbaki hauek ondo egindakoaren ondorioa dira. Nire uste apalaz, oro har boto emaileen konfiantza dauka EAJ-k datozen garaiak gobernuan emateko. EAEko mapa politiko konplexuaren erdiko guneari eutsi diote. Hala ere ez dute nahikoa laguntzarik gobernuan jarraitzeko. Nahita edo nahi gabe ETA eta PSOEren artean eratutako tranpan kateatuta geratu dira.

Nire kinielan ere bai irabazle eman nien, bigarrenarekin 4 parlamentariren aldearekin. Ezin esan urrun nenbilenik, baina... asmatu, ez nuen asmatu.

PSE_EE – Itxaropenak bete dituzte. Aukera ondo profitatu dute eta gora egin dute. Alderdi kohesionatua dela eta hiru lurraldeetan presentzia garrantzitsua dutela erakutsi dute. Hala ere ez dute erakutsi nagusitasunik. Izan ere EAJ-PNV nabarmen nagusitu zaie.

Alderdi honen emaitzekin asmatu nuen.

PP- Behin eta berriz erakusten ari dira gizarte oinarri tinkoa dutela. Izan duten beherakada oso erraz azaltzen da EAJ eta PSEren arteko polarizazioarekin batetik eta UPDren agerpenarekin bestetik. Ondo kudeatu dute Maria San Gilen erretiratzea. Espainiartasunaren ikurra bilakatu dira. PSOEren dohaineko makulua, itxurakeriak tarteko, gobernua osatzeko.

Nire kinielan bi parlamentari gehiago eman nizkien. Ez nuen behar bezala aurreikusi UPDren eragina.

ARALAR – Zorionak!! Bere unea iritsi egin dela ematen du. Oinarria zabaldu dute hiru lurraldeetan. Lau langile on-onak sartu dituzte parlamentuan. Bere liderrak sendotzen eta trebatzen ari dira politikari profesionalen eremuan. Jakina, ARALAR xume bat ongi datorkie alderdi eta indar nagusi askori; ARALAR sendo bat alderdi deseroso eta mehatxagarria bilakatzen da.Ondo kudeatu beharko du bere arrakasta.

Lortu du burua agertzea eta sentsibilitate ezkertiar, nazionalista eta zibilaren etxea bilakatzea. ETAren mundutik urrunduta eta plataforma politikorik gabe zeuden pertsona asko hurbildiko direlakoan nago. Ezker Abertzale Berri baten jaiotza eta konfirmazioa izanen dira ondoko lau urteak.

Hiru parlamentari eman nizkien; lau lortu dituzte. Nire aukera izanik, ez nuen uste hainbeste lortuko genuenik.

EA – Identitate falta duen alderdia delakoan nago. Batean ezkerra, bestean sozialdemokrazia, ondokoan eskuineko politikak egiten dituzte. Bestalde, polo soberanistaren inguruko diskurtsoa sinesgaitza suertatu da EAren ahoan. EAJ dute jatorria eta hura da haien etxea eta politika erreala. Ibarretxek hartzaren besarkadako besoak ireki eta haiek onartu.

Kinielan, alderdi honi dagokionean, asmatu nuen

EB – Nire errakuntza nabarmenetakoa. Hauek ere bai hartzaren besarkadaren zaurien ondorioak ordaindu behar dituzte. Bestalde, abertzale eta ez-abertzaleen arteko dialektikari helduz, beren posizioa ez da argi transmititzen. Ni baiezkoan nengoen; beren autodeterminazioaren aldeko jarrerak bereiziko zituelakoan nengoen; nonbait, ez da nahikoa. Bipolarizazio jokoan, argiago suertatu da PSEren aukera. Baina, geroa oso antzeko egoerak ekarriko ditu eta euren posizioa ez badute zuzentzen, testimonialismoaren ertzetik mugituko direla uste dut.

Kinielan, alderdi txikien kasuan bi parlamentariren diferentzia zenbat suposatzen duen aintzat harturik, huts egin nuen.

UPD – Nahiz eta inkestek parlamentari bat aurreikusi Arabaren eremutik, ez nuen uste lortuko zutenik. PPren unibertsoko bozkak direlakoan nago (Unidad Alavesaren kulturatik eratorriak). Beraiek ez baleude, PPk parlamentari bat gehiago luke. Bene-benetan luze gabe desagertuko direlakoan nago. Txikitasunean, ez dira mehatxu; hazten badira alderdi espainiar-zale nagusiek, era batera edo bestera, janen dute.

Kinielan ez nuen asmatu UPDri dagokionean.

Eta geroan, zer?

KINIELA, Bigarren partea.

Nor izanen da hurrengo lehendakaria?

Nire ustez Patxi López izanen da. Zergatik? Amparo, Arantxa eta haiek bezalako beste politiko asko kartzelara eramatea erraztu eta zirkinik egin gabe ikusi dituenak, ez du bada gobernua hartuko? 100.000 boto sistematik kanpo utzi dituenak, ez du bada boterea hartuko? Nahi eta nahi ez, behartuta dago. Ez dira alferrik honaino iritsi.

Bestalde, botere politiko eskuindar eta espainiar-zale guztiek behartuko dute Lehendakaritza hartzen. Prentsa espainiarra leitzea besterik ez da behar. Era berean, Patxik izan ditzakeen zalantzen aurrean, hasi da nabarmen egiten PPren presioa. Botere guzti hauek, honaino iritsita, ez daude prest aukera galtzeko, eta Patxi da beren aukera. Bestalde, Patxik ez du kezkatu beharrik, komunikabide espainiar-zaleek zilegitasunik gabeko aukera zuritzeaz arduratuko dira, zintzo eta fin.

Egun hauetan aniztasuna hitza barra-barra erabiltzen ari dira politikariak. Erkidego Autonomoko honen aniztasuna ordezkatuta egongo al da hurrengo gobernuan? Sikiera ere, ordezkatuta egongo al da hurrengo parlamentuan?

KINIELA

2009-02-27T04:18:00.000-08:00

Agur t’erdi irakurle laguna:
Gaur bukatzen da EAEko hauteskunde kanpaina. Gaur goizean egon naiz gosaltzen Ezker Abertzale Ilegalizatuaren unibertsoko bi lagunekin. Igandeko balizko emaitzei buruz galdetu egin diet. Euren tristura, etsipena, desmotibazioa eta gogogabetasuna, nirekin aritzeko gai honi buruz, nabarmenak izan dira.
Ez dut nire baitan inolako errudun sentimendurik. Baina neu ere bai goibel samar nago daukagun egoerarekin. Partaidetza normalizatua izan duten (dugun) alderdietako bakar batek ere ezin ezingo du ordezkatu gizarte sektore garrantzitsu honi dagozkion ahotsa eta erakunde-ordezklaritza. Lekua bete, beteko dugu; ordezkatu inola ere ez. Eskasi demokratikoa izanen du hauteskundeen ondoren eratzen den parlamentuak.

Baina gai korapilatua utzirik, politikaren alde ludikoari helduko diot: nire kiniela botako dut!!
Hona:

EAJ-PNV: 28 parlamentari
PSOE: 24
PP: 15
EB: 3
Aralar: 3
EA: 2

Igandeak erranen!

Nor ausartzen da besterik botatzen?

Emaitza edozein dela ere, eratorritako parlamentua ez da izanen gure herriko aniztasunaren adierazle.

Pake- bidea aniztasunaren onarpenean dagoelakoan nago: hain erraz eta hain zail.

J.I.lagunak idatzitakoaren gainean

2009-02-22T13:56:00.000-08:00

Juan Ignacio lagunak EAEko hauteskundeen bultzadaren eraginez egituratzen ari den mapa politikoari buruz analisi politiko zehatza argitaratu berri du BERRIA paperezko egunerokoan.

Analisi arrazionala iruditu zait, errealista eta ondo zentratua. Honela adierazi diot berari eta zoriondu egin dut. Begi zorrotza du nire lagunak eta bere analisiak maiz agertzea espero dut. Artikulu honen haritik berak komentatu egin dit, idatzian agertutakoaz gainera ezker politikoaren berregituraketa dinamika antzematen duela. Ez dugu aukerarik izan gai interesgarri honi buruz aritzeko. Horren faltan bihoaz hausnarketa pertsonal labur batzuk euskal ezkerraren berregituraketaz.

Lehenik eta behin, bat egiten dut Juan Ignacioren iritziarekin: euskal ezkerra berregituraketa prozesua bizitzen ari da. Mugimendu honen ardatzak, nire ustez, hauek dira:

1.-Euskal Ezker Espainiazaleak baztertu du politika frontista oldarkorra. Eskuin espainolarekiko alde ideologikoa zabaldu du; identitate “baskistagoa” agertzen du adierazpen publikoetan; politika sozialak aldarrikatzen ditu,… eta oro har, kataluinaren eredua jarraikiz, espazio aurrerakoi, euskalzale moderatu eta integratzailea okupatu nahi du. Zaila da esatea zein den euskal unibertso politikoaren erdigunea, baina ezker espainolazale hau espazio honen bila mugitu delakoan nago. Berregituraketa ideologikoa bizitzen ari gara, Zapatero zein Patxi Lópezen eskutik.

2.-Ezker Abertzale Nagusiak, bere lerroak estu kontzen ditu; trinkotuta daude bere oinarrizko hastapen ideologikoen inguruan. Baina, nago, noraezean dabiltzala estrtategia eta taktika politikoa finkatu nahirik. Bi galga astun dituzte, Espaina Erresumaren eraso etengabea eta ETArekiko lotura anbiguoa. Ez dirudi bata zein bestea geldituko direnik epe txikian. Honek higatuko du aukera politiko hau, geldi-geldi baina eten gabe. Bestalde, ETAren jardueraren jasanezintasunak gero eta militante gehiago aldetzen ditu. Ezker Abertzale sektore hau bizitzen ari den zurrunbiloak militantziaren trinkotasuna eragiten du batetik, baina, bestetik, gizarte laguntzaren higadura ere bai. Eta, luzera, azken hau da garrantzitsuena politikan eragiteko.

3.-Eusko Alkartasuna, sorreratik beretik, kontraesanen artean garatu du bere proiektu politikoa. Sorburua, EAJ izanik, harekiko hurbiltasun ideologikoa ezin ezkutatzekoa da. Ezker Abertzalearen esparruan izan den alternatiba pakezalearen faltak, sektore ezkerzale batzuk EA-ren unibertso txikira hurbiltzea erakarri zuen. Baina, gutxiengoa da EAren lerroetan, eta ez dira aski alderdi honi identitate ezkerzalea atxekitzeko. Hauteskundeen aurreko EAJrekiko hausturak kalte handia eginen dio. Nire ustez, higadura nabarmena jasanen du. Ustezko emaitza negatiboek areagotu ditzakete porrot pertzepzioa eta barne liskarrak. Geroari begira deskonposatzen ari den indarra dela ematen du.

4.-Ezker Batuak espazio ideologiko propioa duela iruditzen zait. Espazio hau txikia delakoan nago ere bai, baina leiala. Hauteslego militantea du, ezker arima duena. Ez dira nazionalistak, baina autodeterminazio eskubidea aitortzen diote Euskadiri. Horra ezaugarri ideologiko definitzailea. Bere txikitasunean, argi-argia da. Eta horrek PSOE-tik urruntzen du, bai eta nazionalismotik ere bai.

5.-Aralar da, niretzat, galdegai nagusia hauteskunde hauetan. Aralar haziz doa, baina oso-oso mantso. Ikustear dago Euskal gizarteak ematen dion babesa. Alderdi hau abertzale, ezkertiar, independentzia-zale, eta zibiletzat aurkezten du bere proiektu politikoa. Zenbat bozka etorriko zaio ETArekin nazkatu den Ezker Abertzale Ofizialaren esparrutik? Zenbat bozka etorriko zaio EAren alde ezkerzaletik? Zenbat bozka berri hartuko du? Zenbateko sinesgarritasuna sortzen du bere proiektu politikoak?

Honenbestez, Ezkerraren esparruan PSOEK hartu du zentrorantz orientatzen den espainiartasun eta aurrerakoitasun moderatuen eremu zabala. Nazionalismoaren eremuan ezkerraren unibertsoa konplexuagoa da; mugimenduak mantsoagoak dira, baina, agian, hauteskunde hauek bultzada bat emanen diete joera berritzaileei. Poliki-poliki Aralar haziz doa eta Ezker Abertzale Ofiziala higatzen ari da. EAko militanteek beraiek erabakiko dute noiz arte iraunen duen gerorik gabeko proiektu politikoa. EB testimonialismoaren ertzetik mugituko da, baina eutsiko dio. Nire ustez Aralar-ek izanen du zeresan handia gure gero hurbilean. Agian ez da oraindik iritsi bere unea, baina lehen edo gero, iritsiko zaio.

Konpromisoari eutsiz,besterik ez

2009-02-20T08:56:00.000-08:00

Agur t'erdi irakurle laguna; alegia agur t'erdi niri, neuri, nure buruari. Izan ere idazle hau bera da blogaren irakurle bakarra; nik dakidala behintzat. Nondik edo handik inor ere sartzen bada,utzi dezala seinalea, please .

Utzi ditzagun txorakeriak. Nire buruari astean behin idazteko konpromisoa ezarri diot, eta gaurkoan, ideia handirik gabe heltzen diot zereginari.

Hauteskundeak: politika maite dugunontzat egun politak dira. Eztabaidak, hauteskunde programak, eskutzitzak, iragarkiak,... eta bukatzeko, bozketa egun kizkigarria. Elkarrekin itxarotea, tentsioa, emaitzak tantaka, telebistetako matrakak, elkarrizketak, soziologo guztijakitunen analisiak... Uf... Txute bat!!
Baina... zenbat etsipen, zenbat tristura, zenbat sufrimendu,... Zenbat lagun kartzelan, zenbat lagun mehatxupean, zenbat lagun bizkarzainez lagunduta...

Urruti dugu aniztasunean bizitzeko ikasgaia

Amorrua

2009-02-16T04:24:00.000-08:00

Lehengo batean lagun kuadrila elkartu ginen eta bazkalostean, ariz ariz, hauteskundeei buruz aritu ginen. Abertzaleak gehienak, denak ez, norberaren hautuaz solastu genuen. Neu Aralarreko milintantea izanik, lotsatu egin nintzen Ezker Abertzale Ofizialaren lagun minak bere ezintasuna adierazi zigunean. Tristura begietan eta amorrua bihotzean. Ezintasuna, berea eta nerea.
Benetan, Espainiako erresumak zabaldutako tranpan ez ote garen erori susmoa daukat. Denborak argituko digu.
Nik neuk argi daukat PSOE-k eta PP-k desligitimizatu dutela joko demokratikoa. Eta luzera denok ordainduko dugu, denok GAL-en pasarte madarikatua ordaindu egin dugun bezalaxe. Estatuak, Galen bidez, Biolentziaren apologia eta aldarrikapena egin zuen bezala, oraingoan ere bai norberaren komenentziaren arabera mugatutako demokraziaren apologia egiten digu. Estatuak, bere nahien arabera hautatzen baditu demokraziaren partideak, erakutsi egiten digu, behin eta berriz, hala jokatzea zilegia dela. Lekzio ederra, halajainkoa!!
Demokraziak ez du laburbiderik; inongo aldetik ere.

Arantxa

2009-02-13T08:03:00.000-08:00

Preso politiko guztiak behar ditugu, askatasunean. Denak dira beharrezkoak; ez ezinbestekoak, bai beharrezkoak. Guztien artetik bat dut burutan, ezin aldenduz, bereziki. Gogoan daukat bere ekimentasuna, irmotasuna eta argitasuna. Ezkertiar eta independentzia-zale porrokatua, nekaezina. Gogoan ditut bere esku hartzeak gure Gobernu Kontseiluan, beti erne, akuilua prest, bidegabekeria eta errakuntza inor baino lehenago argitara ekarriz eta salatuz.
Soluzioa, eskaintza.
Gogoan dut bere bila joan izan naizenean beti gertu topatu dudala hitz egiteko, baita lankidetzarako ere hala egokituez gero.
Ezkertiartasuna muinean eta Euskal Herria ariman.
Erresumak eraman zaitu. Erresumak lapurtu digu zure hitza.
Zure falta sumatzen dut, Arantxa.

Lehendabizikoa 2009ko hautekundeen bezperetan

2009-02-11T04:25:00.000-08:00

Blog hau irekitzen dut Euskal Erkidego Autonomoan hauteskunde kanpaina ofiziala zabaltzen den egunean. Izan ere 2009ko martxoaren 1ean bertako parlamentua osatzeko hauteskundeak izanen dira.
Zurrunbilo politikoa azeleratu egin da: estatuak bidea itxi nahi dio ezker abertzale muturrekoari, ETAk atentatua egin du Madriden, alderdi abertzaleak sakabanatuta daude, krisi ekonomikoaren atzaparrak hurbiltzen ari dira,... eta jende xehea aspertuta eta politikoengandik urrunduta dagoela ematen du.
Une honek Ezkerraren beharra du. Une honek Euskal Indar Sendo baten beharra du. Une honek Politika Zizbil eta Pakezaleak behar ditu. Une honek Irudimenaren beharra du.
Gai izanen al gara honelako politikak diseinatzeko eta mugiarazteko?